العودة   منتديات الشبول سات > المنتديات العامة والمنوعة > منتدى الأبحاث والكتب والبرامج التعليمية

إضافة رد
 
أدوات الموضوع انواع عرض الموضوع
  #1  
قديم 09-30-2010, 08:28 PM
الصورة الرمزية ابو فارس
ابو فارس ابو فارس غير متواجد حالياً
 




معدل تقييم المستوى: 0 ابو فارس سيصبح متميزا في وقت قريب
افتراضي صفحه فيها قصص وروايات منوعه للكبار والصغار

في يوم من الأيام
كان هناك رجلا مسافرا في رحلة مع زوجتهوأولاده
وفى الطريق قابل شخصا واقفا في الطريق فسأله
من أنت؟
قال:
أنا المال
فسأل الرجل زوجته وأولاده:
هل ندعه يركب معنا ؟
فقالوا جميعا:
نعم بالطبع فبالمال يمكنناان نفعل أي شيء
وان نمتلك أي شيءنريده
فركب معهم المال
وسارت السيارة حتى قابلشخصا آخر
فسأله الأب : منأنت؟
فقال:
إنا السلطةوالمنصب
فسأل الأب زوجته وأولاده
هل ندعه يركب معنا ؟
فأجابوا جميعا بصوت واحد:
نعم بالطبع فبالسلطة والمنصبنستطيع إن نفعل اي شيء
وان نمتلك اى شيء نريده
فركب معهم السلطة والمنصب
وسارت السيارة تكمل رحلتها
وهكذا قابل أشخاص كثيرين بكل شهوات وملذات ومتع الدنيا
حتى قابلوا شخصا
فسأله الأب
من أنت ؟
قال:
أنا الدين
فقال الأب والزوجة والأولاد في صوت واحد
ليس هذا وقته
نحن نريد الدنيا ومتاعها
والدين سيحرمنا منها وسيقيدنا
و سنتعب في الالتزام بتعاليمه
و حلال وحرام وصلاة وحجاب وصيام
و و و وسيشق ذلك علينا
ولكن من الممكن إن نرجع إليك بعد إن نستمتع بالدنيا وما فيها
فتركوه وسارت السيارة تكمل رحلتها
وفجأة وجدوا على الطريق
نقطة تفتيش
وكلمة قف
ووجدوا رجلا يشير للأب ان ينزل ويترك السيارة
فقال الرجل للأب
انتهت الرحلة بالنسبة لك
وعليك إن تنزل وتذهب معي
فوجم الأب في ذهول ولم ينطق
فقال له الرجل
أنا أفتشعن الدين......هل معك الدين؟
فقال الأب
لا
لقد تركته على بعد مسافة قليلة
فدعني أرجع وآتى به
فقال له الرجل
انك لن تستطيع فعل هذا فالرحلة انتهت والرجوع مستحيل
فقال الأب
ولكن معي في السيارة المال والسلطة والمنصب والزوجة
والأولاد
و..و..و..
فقال له الرجل
إنهم لن يغنوا عنك من الله شيئا
وستترك كل هذا
وما كان لينفعك إلا الدين الذي تركته في الطريق
فسأله الأب
من أنت ؟
قال الرجل
انا المــــوت
الذي كنت غافل عنه ولم تعمل حسابه
ونظر الأب للسيارة
فوجد زوجته تقود السيارة بدلا منه
وبدأت السيارة تتحرك لتكمل رحلتها وفيها الأولاد والمال والسلطة
ولم ينزل معه أحد
قال تعالى
قل إن كانآبآؤكم و أبناؤكم و إخوانكم و أزواجكم وعشيرتكم وأموال اقترفتموها وتجارة تخشونكسادها و مساكن ترضونها أحب إليكم من الله ورسوله و جهاد في سبيله فتربصوا حتى يأتي
وقال الله تعالى
كل نفس ذآئقة الموت وإنما توفون أجوركم يوم القيامة فمن زحزح عن النار وأدخل الجنة فقد فاز وما الحياة
الدنيا إلامتاع الغرور
والسلام عليكم ورحمة الله و بركاته
اقْبَل تستفيد و انشُر تُفيد
وأخيراً
اللهم اجعلنا من أهل الجنة
أرجو منكم ألا تنسونا من صالح دعائكم

 

 

رد مع اقتباس
قديم 09-30-2010, 08:29 PM   رقم المشاركة : 2
ابو فارس
 
الصورة الرمزية ابو فارس





ابو فارس غير متواجد حالياً

ابو فارس سيصبح متميزا في وقت قريب


افتراضي

(موت الغريب)
في احد الشوارع المزدحمة بالمارة في بلاد الغربة وقع شاب في مقتبل العمر مغشيا عليه فاحتشد الناس حوله.
قال احدهم:هل مات
اجاب الثاني:كلا اطلبوا سيارة الاسعاف
وفي غرفة الانعاش في المستشفى حضر الطبيب وسال الممرضة التي تعتني بالشاب
-هل عرفتم من هو؟
فاجابت الممرضة
-نعم انه غريب
فقال الطبيب:
-مسكين هذا الغريب..انه يحتضر..انه يلفظ انفاسه الاخيرة
والشاب المحتضر يسمع مايدور حوله ولكنه فاقد القدرة على النطق وحاول جاهدا ان يفتح عينيه ولكنه لم يفلح
واخذ يتخيل نفسه في شوارع وازقة بلدته الجميلة.
وقال في سريرة نفسه..اه كم اشتقت الى حضن والدتي...وكم اود ان اعانق ابي واقبل يديه وابكي على صدره.
وحبيبتي ياترى كيف ستتلقى خبر موتي؟
ياالهي...كم اتمنى ان انطق واقول لمن حولي بالله عليكم...بعد موتي ارسلوا جثماني الى وطني ليدفنني ابي هناك.
وفي تلك اللحظة نزلت دمعة يتيمة من عينه اليسرى واحس براحة عظيمة ودق جهاز تخطيط القلب المعلق بجانبه على الجدار معلنا موت الغريب

رد مع اقتباس
قديم 09-30-2010, 08:31 PM   رقم المشاركة : 3
ابو فارس
 
الصورة الرمزية ابو فارس





ابو فارس غير متواجد حالياً

ابو فارس سيصبح متميزا في وقت قريب


افتراضي

وبقيت وحدي

(1)
الصداقه من اقوى العلاقات الانسانيه,علاقه يميزها انها تجمع عدة مشاعر واحاسيس في اطارها مثل المحبه ،التضحيه وغيرها.
يمكن اغلبنا او اقدر اقول يمكن كلنا حصلت له مواقف مع اصدقاءه منها الحلو ومنها المر,منها اللي تقوي العلاقه ومنها اللي تنهيها.
قصتي تتكلم عن هالموضوع,تقدرون تقولون انها تحمل مشاعر اكثر منها احداث لكني قررت بعد تفكير طويل اني اعرضها للناس عشان يستفيدون منها.
احنا كمجتمع للرجال حدود الصداقه غالبا معروفه عندنا واغلبها تكون للوناسه والمصلحه,انا مااقول الكل بس اكثرها لكن اللي صار معي شي ثاني وهاذي قصتي...
في عام1408هـ ,كنا تونا منتقلين لمدينه الرياض والدراسه بدت من اسبوعين تقريباكنت في سنه رابعه ابتدائي دخلت فصلي الجديد وسوا الاستاذ تعارف بسيط بيني وبين الطلاب,لما جا وقت الراحه طلع الجميع الا انا ,دخل ولد اسمراني شعره حوسه واسنانه الاربع الاماميه اللي متكسر واللي طايح,مشمر اكمامه ووجهه كله مخوش وحالته لله الا انه رغم كل هالبلاوي فيه شيء يخليها مو باينه!!..
قعد يحوس في شنطته ساعه وكل دقيقه يطلع خرابيط وكل شوي يرفع عينه عندي واخيراطلع منها نبيطه,وقبل لا يطلع التفت علي وكان من النوع الي كنه بينطحك وهو يطالع، منزل راسه شوي ومعبس طول الوقت بس كانت بريئه اكثر من ان تكون مرعبه!! وقال بلدغه طفوليه سببها واضح وهو اسنانه اللي حالتها صعبه:انت الحين ليش جالس لحالك؟..كانت هاذي اول جمله سمعتها من الانسان اللي صار بعد كذا أغلى البشر على قلبي, كان معروف عني اني انطوائي ومنعزل هاذي طبيعتي حتى اني اتوتر لما يكلمني احد ما اعرفه رديت عليه:بس كذا انا ما ابي اطلع وبعدين انا ما اعرف احد هنا...وبنفس النظرات اللي والله اعلم انها كانت عاده عنده...تعال معي وانا اعرفك على نص اللي فالمدرسه... كان يجرني من يدي وانا اسحبهابخوف...لا لا انا كذا مرتاح قلت لك ما ابي اطلع...لكن الولد اصر لين طلعني معه بالغصب,وزي ما قال عرفني على نص المدرسه تقريبا لكن تبون الصدق حسيت اني تعلقت فيه هو!!يمكن عشان شخصيته عكسي تماما اجتماعي,خفيف دم والكل يحبه ويحاول يتقرب منه صحيح انه كان شيطاني ومشاغب لكنه ماكان يتعدى على احد!! حسيت اني مبهور بشخصيته ورغم انه ذكي جداً الا انه فالدراسه ما كان بالحيل بس كان يعرف يمشي عمره من يومه صغير.
وعلى كثر الاولاد اللي يعرفهم الا انه بعد تعلق فيني فوق ما تتصورون صرنا ما نتفارق ابد ولا يشوفون واحد فينا بدون الثاني.
مرت السنوات وصداقتي تزداد قوتها مع خالد..مرت علينا سنين الطفوله والمراهقه وحنا سوى ودخلنا الجامعه وتخرجنا وحنا ما عمرنا تفارقنا,حتى في السفر ما اذكر ان واحد سافر بدون الثاني الا اذا كانت السفره مع الاهل,اغلب الناس اللي يعرفونا يحاولون ياخذونا قدوه وكثير منهم يضربون المثل في صداقتنا,يمكن تتسآءلون وش سر هالصداقه العميقه؟!! شي واحد كنا نطبقه بدون ما نحس من يوم حنا صغار,شي عجزت اغلب الناس انها تفهمه في تعاملها مع بعض، وهو ان كل واحد فينا كان متقبل الثاني بكل ما فيه من العيوب ولا عمر واحد فينا حاول يغير الثاني ويمشيه على طريقته برغم الأختلاف الكبير بينا..
خالد كان فيلسوف بالفطره وبسبب علاقاته الكثيره، وكنت اتعلم منه كثير,لما اسأله كيف يقدر يجمع كل هالناس حوله كان يقول كلمات بسيطه لكن تركت فيني اثر كبير كان يقول:اسمع يابندر الناس لها مشاكلها وكل واحد فهالدنيا صدقني منشغل في نفسه ولا احد تهمه مشاكلك فاذا تبي الناس يحبونك انسى نفسك وفكر فيهم وكيف تساعدهم في حياتهم بقد ماتقدر.
قصتي الاساسيه اللي ابيها توصلكم مو في كيفيه صداقتنا لاني مهما شرحت ماراح اقدر اوصلكم مدى عمقها لكن الحدث اللي قلب حياتي ولا أظن ترجع زي ما كانت.
في يوم اربعاء جاني خالد للاستراحه اللي نجتمع فيها مع الشباب والفرحه مبينه في عيونه وسحبني من بينهم...تعال بندر ابيك في كلمة راس...لما صرنا برى...عندي لك مفاجأة ...وابتسم,انا ذاك الوقت اللي يشوف وجهي يقول خبل اناظر فيه وفاتح فمي...كمل كلامه..ابشرك الوالده خطبت لي!!!في هاللحظه حسيت كأن احد عطاني كف على وجهي... ايييييييييييييييييييش؟؟؟؟!!!!... طالعني بنفس طريقته يومه صغير واللي ماتغيرت ابدا...وراك تقولها كذا كنك مو مبسوط...وبإرتباك رديت ...لا مبسوط بس انت فاجأتني وصدمتني صراحه! ما عمرك جبت طاري للزواج!!!!...
ضحك وهو يغمز...عارف بس الوالده اقترحت علي الموضوع وقلت لها مافي مانع ,توقعت ان السالفه كلام او عالاقل بتاخذ وقت بس ماشاءالله عليها يومين الا هي جايتني تقول ترى لقينالك الظاهر انها حاطتها في بالها من زمان,وبعدين ما عاد الا خير والا شرايك؟!!... يعني للحين ما شفت البنت ياخلود...آفا عليك بس يابندر!!! الحين اقولك توي داري وجيتك بسرعه,الوالده تقول انهم حددوا يوم الاثنين عشان اجيهم اشوفها... تفاجأت...الله بهالسرعه؟؟!!.. مو اقولك شكل السالفه مطبوخه من قبل ..على كلا" الله يوفقك انشاءالله... عقبالك_ يالرَمَت_(خالد لما كان صغير كان يحاول يناديني بكلمه الروميت الانجليزيه لكنه كا ن يقولها بهالطريقه ومشت معنا كذا صارت زي اللقب بيني وبينه),اغتصبت ابتسامه...لا وين تو الناس علي المهم الحين خلنا نرجع للشباب لا يبدى التعليق... وبتعجب ممزوج بغضب مصطنع رد خالد...لحظه لحظه بندروه الحين اقولك خطبت وزحمه ولا تعزمني على شي بهالمناسبه؟؟!!على الاقل ودني لكوفي شوب ياخي!! ضحكت...لا ياعمي الحين قهوه وبعد شوي الا احنا في واحد من هالمطاعم حقتك اللي فواتيرها تكسر الظهر تراي اعرفك زين خلاص عشرة عمر...رد..والله انك قعيطي مستخسر فيني؟؟ ...وقعدنا نضحك,حطيت يدي على كتفه..ولا يهمك ياخالد اذا صار شي اكيد ,ابشر بذيك العشوه اللي يحبها قلبك فالمطعم اللي تختاره وش تبي بعد؟؟!... "كان ودي اعزمه بس النفسيه عدم"..رد بغمزه.. ماتقصر اصيل يابندر بس اهم شي لا تفشلنا مثل ذاك اليوم!! ...افشلك!!متى ياويلك من الله؟؟!..عطاني نظره اللي مو مصدق... معقوله نسيت ذاك اليوم يوم يمدح لنا خوينا سامي ذاك المطعم ,قلنا لازم نجربه ونشوف... لما تذكرت الموقف بديت اضحك... اوووووه الله يقلع شرك وش ذكرك بهالموقف الحين..ابتسم خالد ويده على وجهه...تذكر؟؟ يومها طلبنا عصير وطقيت الصدر يعني انت اللي بتدفع ويوم جا الحساب جت معه المصيبه، والله لو انك شايف وجهك يابندر يوم شفت الفاتوره تقول صابين عليك مويه بارده...انحرجت...لا والله!!!على الاقل احسن من اللي قعد يتفلسف ويسوي روحه ابو العريف,لا وتاشر بيدك بعد كننا في ملعب،وبديت اقلد صوته ونظرته المعروفه...لو سمحت الفاتوره مو لنا حنا طلبنا عصير بس!!,والله لوك شايف وجهك انت يوم رد عليك..."نعم ياسيد هاذي فاتوره العصير بس"الحين من اللي طلع فشل الثاني؟!... ابتسمت... اذكر مابقى في جيوبنا شي ما طلعناه ويالله كفى ولقطنا وجيهنا وطلعنا وحنا نتصدد لا احد يشوفنا.. .وطوال ماكنت اعيد القصه وخالد ميت من الضحك، كان يسعدنا ان حنا نعيد الذكريات اللي مثل هاذي المهم رجعنا عند الشباب.
من بدا موضوع الخطبه حسيت انه خلاص ماراح يرجع شي زي اول, تضايقت مره بس ما ادري وش اللي فكرت فيه يعني مستحيل نقعد كذا بدون زواج للابد كان واقع لازم ارضى فيه.
لما رجعنا داخل كان مستانس,يلعب,يضحك وينكت صحيح هاذي عادته لكن اليوم كان بزياده اما انا كنت عكسه تماما حسيت اني بأفقد هالأنسان... الشخص الوحيد اللي اعتبرته صديقي.
************************
(2)
يوم الاثنين العصر جاني للبيت!! خفت يكون صاير شيء...خير خالد عسى ما شر...وبتوتر واضح في صوته.. ابد والله احس اني متوترشوي... ابتسمت له... يابن الحلال شده وتزول زي غيرها... ابتسم وقال...وشرايك تجي معي!! ...قعدت اطالعه ابي اتاكد انه جاد ...انت صاحي!!وين اجي معك؟؟! ...طيب تعال وخلك فالسياره بس... شديت على يده وحطيت عيني في عينه وقلت:يابن الحلال رح لحالك وانا بستناك في بيتنا طيب!!..كان يطقطق اصابعه... ادع لي يالرمت... ما يحتاج قول الله يوفقك ويسنع دربك انشاءالله, يالله عاد الحين رح وحلق وتكشخ تلقاك شهر ما دخلت الحلاق على هالوجه... كنت احاول اضحكه لانه واضح انه متوتر...طيب اجي عندك عشان تشوف شكلي قبل اروح لهم...كتمت ضحكتي...انا لله وانا اليه راجعون؟!!انت وبعدين معك ياعمي اصلا البنت اول ما تشوف عيونك بتوافق لا تشيل هم وتوكل على ربك ...الله يستر ما ادري وش فيني خايف ياعمي؟!...(كلمه ياعمي معروف اني دايم اقولها فاذا قالها خلود لي يعني خلك معي او افزع لي زي ماتقولون كانت كلمات بينا)...عادي كل العالم يتوترون في هالموقف بس انت شد حيلك ولا تتأخر على الجماعه...طلع من عندي, وبعد العشاء كنت انا اللي ما ادري وش اسوي بعمري من التوتر وكل شوي ادق عليه لدرجة ان ريم اختي حاولت تهديني...ما صارت يابندر يمكن انت متوتر اكثر منه...ياريم هذا خالد تعرفين يعني وشو خالد هذا اقرب لي من نفسي... والله عارفه بتعلمني فيكم بس اذكر الله وهد الوضع شوي...ما بقى عندي صبر وطلعت للشارع استناه,بعد حوالي الساعه شفت سيارته مقبله بسرعه جنونيه كالعاده لدرجة انه بغى يدخلني تحتها لولا اني بعدت بسرعه,نزل وشوي ويناقز من الفرحه.. وبرعب صرخت فيه ..خلووووود!!!انت خبل بغيت اروح تحت سيارتك..ناظرني نظرات جديده علي وابتسم..سألته..ها بشر؟؟ ...لمني الرجال وعرفت انها دخلت مزاجه لدرجه انه ما عاد يدري وينه فيه,المشكله انه يتكلم ولا فهمت من اللي قال ولا حرف, كنت اعرفه عاطفي بس ما توقعت انه يتعلق لهالدرجه وبهالسرعه,فرحت له لما شفت كل هالسعاده فيه لكني بديت اتخيل وشلون بيصير حالنا بعد هالتغير اللي ما طرى على بال, يمكن تستغربون ليش كنت متخوف كثير بس صدقوني لما يكون عندك انسان موجه لك كل ذره في كيانه وكل فكره معك ولفتره طويله من عمرك وفجأه يجي من يشاركك فيه ,صدقوني تتلخبط حياتك ولو كانت المشاركه بسيطه وشلون لو جا الانسان اللي بيصير منافس لك؟! مو حب تملك لكنها عاده وغلا كبير...قطع حبل افكاري خالد وهو يقول: على فكره بندر في شي ابي اقول لك اياه...وجهه وهو يقول هالكلام ذكرني بوجهه لما جا يعلمني انه سرق شاهي وحليب من غرفة المدير واحنا صغار،قلت بأبتسامه..وش مسوي بعد هالمره؟؟... مسكني بيدي وجلسنا على رصيف بيتنا حسيت الموضوع جد قال: صراحه يابندر انا ما قلت لهم اني ادخن؟!!لحظه قبل لا تقول شيء اصلا هم ما سألوا الا اليوم وانحرجت وقلت لهم لا ما ادخن خبرك خفت يرفضون...افا ليش يا خالد تبدى حياتك بكذبه تافهه؟!.. ومن قال لك انها كذبه؟! اصلا انا نويت اني اوقف زقاير...انا لما قال لي كذا ضحكت!!تذكرت السنين اللي كنت احاول فيه انه يوقف وكيف انه حاول كم يوم ولا قدر وفالاخير لما اشوفه يعاني نستسلم, لكن من عيونه واضح انه كان مصر ومصمم هالمره على هالشي والله العالم.
بندر اكيد بيجون يوم ويسألونك انت بالذات من بد الشباب عشان كذا حبيت اعطيك خبر..مو شرط يا خالد بالعكس كثير ناس مايفضلون يسألون الاصدقاء المقربين وطبعا واضح السبب,لكن لو جاني احد وسألني عنك ماراح اكذب عليه بقوله هالكلمتين يالرمت: خالد صديقي من سنين والف النعم فيه بس انا متفق معه لما نتزوج محد يعطي معلومات عن الثاني عشان الإحراج لان زي ما الواحد يقول الحسنات لا زم يقول السيئات مافي كامل فهالدنيا هذا زواج مو لعبه وحنا ما نبي نضطر لهالشي, بس اذا تبي العلم باختصار لو طلبني اختي عطيته اياها وهذا كل اللي عندي..
لما انتهيت من كلامي ربت على كتفي وقال ريحت بالي ماخاب ظني فيك يالرمت انا اشهد اني عرفت من اخاوي،توادعنا وركب سيارته, دخلت البيت وانا احس بضيقه شديده صحيح دخلنا ال26 ذاك الوقت يعني طبيعي اللي قاعد يصير لكن ما ادري وش اللي كان صاير معي.
كان يكلمني كل يوم عن المستجدات اللي صارت ويسألني اذا كان احد جاني من اهل البنت وانا اقول له للحين ما شفت احد وحتى لما نتقابل طول الوقت يتكلم فهالموضوع,بيني وبينكم بديت اطفش صار كل كلامه عن زواجه لكن اللي معجبني في هالسالفه كلها اصراره على ترك التدخين صحيح حالته كاسره خاطري يعني الصداع ماتركه ابد وعيونه دايم حمر ونفسه في خشمه طول الوقت والربع كلهم يحطمونه يقولون اول ما تتزوج بترجع لا تتعب نفسك، بس في تقدم قعد اسبوع وشوي بدون ولا زقاره,كان مصر على هالبنت ومايبي شي يوقف في طريقه وخالد صديقي واعرفه زين اذا حط شي في باله يجيبه.

*********************************************
(3)
يوم الخميس زي عادتنا كنا مجتمعين انا والربع فالاستراحه وخالد للحين ما جا صار دايم يتأخر لكن عمره ما تركنا,كنا جالسين بعضنا يلعب ورقه والباقين يسولفون,انا كنت العب وسمعنا صفقة الباب اللي برى وبما ان خالد اللي ناقصنا عرفنا انه هو,وبدى التعليق اللي يقول جانا العريس والثاني يقول الله يعينا عليه من اول ما وقف زقاير وهو نار شابه,قلت لهم:كلش الا خويي عاد لحد يغلط عليه وانا موجود ...وقعدنا نضحك ,فتح باب الغرفه والتفت اسلم عليه ماحسيت الا واحد يرفعني من القلابي ويلزقني عالجدار بقوه,لما حاولت اعرف من هو الا هو خالد كان معصب ويصرخ في وجهي ويدفع جسمي عالجدار بطريقه عنيفه, كنت مصدوم واطالع فيه مو فاهم شاللي صاير حتى ربعنا يطالعون بتعجب ولما استوعبوا ان السالفه هوشه قاموا يفكونه عني, في هاللحظه انا للحين ما بعد استوعبت الموقف بس يوم شفتهم يسحبونه عني حسيت انهم اوجعوه بديت ابعدهم معه واحاول احميه بيديني كنت خايف عليه وجسمه صار احمر من تسحيبهم الشديد وانا لهاللحظه ما ادري وش صاير لكنهم كانوا اكثر منا وقدروا يمسكون كل واحد في جهه,سامي كان يسأل خالد بعصبيه: انت صاحي؟!! وش جاك انهبلت؟!وش صاير؟!ورد خالد بصوت انسان ثاني ما عرفه وياليته ما تكلم: اسأل هالجبان اللي قدامكم وش سوى لا تسألوني انا.. في هالوقت بديت استوعب الموقف...خالد قدامي في حاله عمري ما شفته فيها,معصب والكلام يطلع مقطع منه بسبب تنفسه السريع,نظرته ماغيرها تطل من عيونه بس الحقد حل محل البراءه؟؟كان كل شوي يحاول يتخلص من يدينهم عشان يضربني!! تصوروا!!بعد كل هالعمر وهالعشره يضربني انا بندر صديق عمره ورفيق دربه,قلت له وانا احاول اقرب عنده اهديه:وش بلاك ياخالد انا وش سويت ياخوي؟! رجع يحاول يتهجم علي وابعدوني عنه بسرعه..لا تقول ياخوي انا لاني اخوك ولا اتشرف اكون اخوك وبصوت تخالطه البحه من شدة الصراخ وهو يمسك راسه بين يدينه بعصبيه..وبعدين لا تقول وش سويت ياحقير لا تنرفزني زياده...خفت عليه كان يصارخ ما يتكلم ويطلع كلامات زي السم...لما ما تكون قد الكلام اللي تقوله لا تقعد تتفلسف علي يا اكبر كذاب..قال سامي..خالد وش هالكلام؟!! كبر عقلك وخلنا نفهم القصه...صرخ فيه..انتم لا تتدخلون ورجع يطالعني وهو يضرب على صدره بقهر واضح..انت ما شفتني اموت فاليوم عشرين مره وانا احاول بكل ما فيني اني اوقف زقاير ليش تقولهم اني كنت ادخن ليش؟!...كنت هاللحظه زي الغبي وعيوني بتطلع من مكانها رديت.. خالد انا قلت لك محد جاني ولا احد سألني--..كلامي زاد ثورته وقام يتحرك زي المجنون..هذا اللي يبي يذبحني، بندر لا تكذب لا تكذب ما ابي اسمع منك ولا كلمه صحيح انهم رفضوني بس ما يهم البنت بدالها الف وبدت نبرة صوته تخف حدتها..لكن انت ليش سويت كذا يا بندر ليش؟! الكلام اللي قلت لي ذاك اليوم كان كله كذب وتمثيل؟!!على الأقل ليش توعدني وتخلف لو قلت انك بتعلمهم كان تفهمت الموضوع, انت حطيتني في اصعب موقف، معقوله استخسرت السعاده اللي انا كنت عايشها ولا قدرت تستحمل فكره اني ابعد عنك شوي!! معقوله يابندر انت من بد هالعالم كلهم تسوي فيني كذا هذا جزاي اني عزيتك؟؟!..رجعت النبره العاليه.. ما توقعتك كذا ابدا انت انسان اناني تعرف يعني ايش اناني؟! حاولت اتمالك نفسي ورديت بصوت هادي قد ما اقدر...بس لا تكمل لا تقول كلام تندم عليه بعدين يا خالد لا تظلمني وانا اخوك... ضحك بسخريه..اندم!!اندم على ايش والا ايش؟! على العشره الحلوه اللي كانت بيننا والا على16 سنه اللي ضيعتها من حياتي على واحد مثلك والا عالانسان اللي توقعته صديقي وما طلع----وقبل ما يكمل كلمته هالمره انا اللي تخلصت من يدينهم وهجمت عليه ورميته عالأرض, ولما ثبته تحتي رفعت يدي لكنها وقفت وكل عضله فيني ترجف رجفه فظيعه,لان اللي تحتي كان خالد,خالد الرفيق !! خالد الغالي !! يارب انا وش قاعد اسوي معقول امد يدي عليه؟! صرخت في وجهه...اسمع يا خالد كل الكلام اللي قلته ممكن اتغاضى عنه عشان المعزه اللي لك بقلبي ولاني متأكد انه فيه سوء فهم فالموضوع اما انها توصل فيك انك تقول اللي بيننا ما كان شي فهذا اللي ما راح اسمح لك تقوله فااااهم؟!...خلص يدينه من يديني ودفعني من فوقه.. اقول ابعد عني بس... وقف وانا للحين على الارض...اسمع يا بندر هي كلمه و رد غطاها ما عاد ابي اشوفك ولا عاد ابي اسمع صوتك او حتى طاريك وكل اللي كان بيننا اليوم انتهى, الانسان المخادع اللي ما يقدر الصداقه ماله مكان في حياتي ابد, واذا كنت سويت هالحركه خايف انك تفقد جزء مني يا طفل ابيك تدري اللحين انك فقدتني للابد.
طلع من الاستراحه بنفس الحال اللي دخل فيه واشرت لسامي وانا احس بأرهاق شديد :اطلع معه الله يعافيك لا يسوق السياره وهو على هالحال بعد هو مب ناقص جنون فالسواقه..لكنه رجع بعد دقايق يقول انه ما قدر يلحقه.
انتشر الهدوء بعد طلعة خالد وكانوا كلهم يطالعوني مو عارفين وش يقولون,كانوا مصدومين مثلي واكثر,وقفت ويدي على قلبي حسيت اني مخنوق وانا احاول استجمع القوه اللي باقيه فيني قلت:عذرا ياشباب متأسف على الفصل البايخ اللي صار قبل شوي, يالله انا ماشي... سألني سامي بتردد واضح:لحظه قبل ما تمشي يابندر صحيح الكلام اللي قاله خالد؟!هزيت راسي بأسى وانا امسك دموعي اللي عصتها شيمه الرجال وبابتسامه رديت:ليش استغرب منكم انكم تصدقون هالكلام فيني اذا كان خالد خوي الروح قدر يصدقه؟!!!!مع السلامه.. وطلعت, لحقني سامي...خلني اوصلك للبيت يا بندر تراك على طريقي...شكله حاس بتأنيب ضمير وراحمني وهذا اللي ما احبه رديت...لا مشكور انا بخير لا تشغل بالك...وركبت السياره ومشيت.
فالبيت الوالده وريم كانوا فالصاله لما دخلت, واستغربوا رجوعي بدري..بعد السلام سألت الوالده باهتمام:بندر يمه وش فيك؟!... ريم بعد قالت شي زاد الالم اللي في قلبي:عسى ما شر يابندر خالد فيه شي؟؟؟…حاولت امثل اني معصب ..انتِ ماتفهمين؟!! كم مره اقولك يارويم لا تتفاولين على العالم، يا جماعه كل اللي صار ان احنا تفرقنا بدري الليله عادي وشفيكم؟!...قالت الوالده...ياولدي وجهك متغير انا امك واحس فيك قلي يا امي من اللي مضيق صدرك؟!.. قالت ريم: لا يكون متطاق مع واحد من العيال؟؟..قالت امي..وش دعوى ما تعودنا منك ياوليدي هالحركات؟!!
كنت عارف ان شكل ثيابي يدل على اني توي طالع من هوشه…قلت لهم:ريحوا بالكم تهاوشت مع واحد من الشباب بس جت سليمه خلاص عاد فكوني, قالت ريم:اكيد بتجي سليمه اذا كان خلود المرعب ابو المشاكل هو اللي دايم يفزع معك المفروض محد يقرب لمك،هزت راسها كنها تذكرت شيء مو حلو...يمه منه ذاك الولد شراني ياكثر ما صيحني وحسرني وحنا صغار،تذكرين يمه ذيك الايام؟!…ابتسمت امي...اول سنتين من نقلتنا للرياض ماكنت اربط شعرك دايم تجيني تصيحين من تمعيطه لشعرك..قالت ريم..وتضحكين بعد يمه المشكله ان ولدك ذا كان يطقني معه ما كني اخته الحمد الله والشكر... قالت امي..صحيح ان خالد كان شيطان وهو صغير بس والله ان الولد والنعم فيه شوفي وش صار الحين... آلمني كلامها زياده بس سويت الوضع عادي ووجهت كلامي لريم...وانتِ وش تبين ما عندك الا خالد وخالد؟!بعدين تستاهلين رازه وجهك عند العيال فالشارع دايم وهو معتبرك اخته...حسيت اني احرجتها وردت.. انا والا انت اللي ما عنده الا خالد؟!!.. قطعت الحوار و رحت للغرفتي...

*****************************

***********************
(4)

قعدت في فراشي استرجع اللي صار معقوله خالد يسوي معي كذا ويقول عني هالكلام, وبدون حتى ما يفكر وقدام هالعالم كلهم؟!! لا اكيد انا احلم اصلا اللي شفته اليوم انسان ما اعرفه!!!ورغم الإهانه اللي كنت احس فيها والجرح اللي في قلبي الا اني دست على مشاعري ورحت ادق عليه لازم افهم وش اللي مضايقه لهالدرجه ليش؟؟ لانه مو اي واحد لكنه للاسف عطاني مشغول بعدين قفل جواله !!
جلست في بيتنا ثلاث ايام لا رحت للاستراحه كالعاده ولا استقبلت مكالمات من احد حتى اهلي مستغربين ,لكن لان طبعي كتوم ما قدروا يعرفون أي شي.
كانت هاذي اول ثلاث ايام ما اشوف خالد فيها واحنا في نفس المكان مرت علي كنها ثلاث سنوات ,ورغم اللي سواه معي الا انه وحشني حيل واشتقت له ذاك الشوق اللي تحسه يوجعك مو بس نفسي الا تحس شيء يألمك من جد اذا فاهميني!!! ,لكنه الله يسامحه ما حاول يعطيني أي فرصه عشان اتصل عليه.
اتصلوا الشباب من الاستراحه وكانوا حاطينه عالسبيكر وسلموا علي وسألوا عن احوالي عاد واحد منهم اسمه ماجد قال:وينك من زمان عنك يارجال كبر راسك علينا والا عشان خويلد ما عاد يجي صرت انت بعد ما تجي؟!
سمعت كان احد ضربه وسكته المهم قلت:معليش ياشباب انا هاليومين ما اعتقد اني بجي للاستراحه مالي نفس سامحوني..قال سامي:وشرايك نجيك للبيت اذا ما عندك مانع؟!...استغربت بس رديت..بالعكس حياكم الله أي وقت البيت بيتكم...خلاص اذا شفنا يوم مناسب بندق عليك... خير انشاءالله الله يحييكم أي وقت...مع السلامه..
بعد شوي دق خالد!!!!!!!!معقوله ماني مصدق عيوني وش القصه؟! قعدت ساعه اطالع الأسم ابي اتأكد انه فعلا هو، لكن للاسف سويت شي بظل ندمان عليه طول عمري,عطيته مشغول وقفلت الجوال,ليش سويت كذا ما ادري اظن انها كانت ردة فعل طبيعيه بعد اللي صار لي معه وما اعتقد احد يلومني,يمكن ابي ارد له اللي سواه او كنت عارف لو رديت انه بيكون لي فضل عليه وهذا اللي ما ابيه المهم هذا اللي صار,لكن الوضع استمر صار يدق علي وانا ما ارد كنت اعاند قلبي قبل لا اعانده هو, صار يرسل مسجات يترجاني فيها اني ارد لكن اللي فهمته من بعض المسجات انه يبيني اسامحه لانه اكتشف انه غلط بحقي ومن هالكلام اللي خلى عنادي يزيد...
بعد يومين دق علي طلال اخو خالد الكبير هو بعد صديق عزيز يجلس معنا من فتره لفتره فالاستراحه وكنت اغليه من غلى اخوه واحترمه كثير ولا قدرت اصفطه رغم اني عارف سبب المكالمه ورديت: مرحبا طلال... هلا وغلا وش اخبارك وعلومك يابندر؟...ابد والله تمام...انت أخبارك واخبار الأهل؟...تسلم كلهم تمام, بندر ياخوي!!.. ســــم؟ ...سم الله عدوك, انا داق عليك عشان موضوع خالد انا عارف انك ماتبي احد يتدخل فالموضوع حتى خالد مو راضي يتكلم انا عرفت من الشباب وفكرت كثير قبل اكلمك لكني ماقدرت اشوف حالة اخوي كذا واصفط يديني, الصراحه من ذاك اليوم وهو مو خالد اللي نعرفه لا يروح ولا يجي ماعاد يسولف ولا يضحك حتى الاكل دايم ما يشتهي!!والوالده ضايق صدرها عليه تحسب انه زعلان على البنت وتقول لاخواني وين بندر عنه محد بيوسع صدره الا هو!!، صار طول الوقت في غرفته خاصه لما عرف انه مالك يد فاللي صار، وليتها جت على كذا خالد رجع يدخن بعد بس هالمره بشكل يخوف يابندر...قلبي انقبض بس رديت...والله ياطلال انا مقدر موقفك وخوفك على اخوك واعرف ان قلوبكم على بعض دايم وصدقني اخر شيء اتمناه ان خالتي يضيق صدرها وانت عارف زين اني اعتبرها امي الثانيه لكن انا ما غلطت معه ابد,هو اللي جاني ونسف كل شي حلو كان بيننا في لحظه غضب... طيب ماتبي تعرف وش القصه وليش خالد سوى معك كذا؟.. مهما كانت القصه ما تعطيه الحق انه يسوي اللي سواه ترانا ماعدنا صغار وانا اخوك,بالله هاذي طريقه يعاملني فيها؟!! والله اني ما شفته يسوي كذا مع الناس اللي كان يتهاوش معهم وهو مراهق، خالد قدر يقول عني كلام يجرح بدون ما يراعي أي شي ويصدق فيني كذبه بدون حتى ما يعطيني فرصه ادافع عن نفسي...تنهد طلال.. ياخوك اللي صار ان اهل البنت قبل لا نحدد الملكه رفضوا فجأة يقولون انهم عرفوا انه يدخن او على الاقل كان يدخن ولا عندهم استعداد انهم يجازفون ,ومن ضمن الكلام فهمنا ان اللي قالهم بندر وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني؟!وطلع وصار اللي صار لكن اللي فهمناه بعدين انه طلع بندر ولد جيرانا بس تبي الصراحه ما احد من اخواني جا على باله كلنا رحنا لك على طول لما سمعنا الاسم... ضحكت بتعجب وانا اقول في قلبي "هذا الشيء التافه هو اللي خلاك تظلم خويك ياخالد؟!!"رديت على طلال...والله هذا مو ذنبي ولا هو عذر للي سواه معي خالد ظلمني وكسر في داخلي شي عمره ما يتصلح والله انه غالي وانا مسامحه ياطلال ولا ابي شيء منه بس صدقني ما اقدر --وحسيت اني ماعاد اقدر اكمل...بنبره هادئه رد طلال..على كلا انا حبيت افهمك اللي صار وانتم رجال وفاهمين وش تسوون وانا ما اقدر الومك على شيء بس هذا اخوي يا بندر ولازم احاول اسوي اي شي... اعذرني ياطلال ياليتك جيتني في شي ثاني والله رقبتي سداده ... اصيل ما تقصر يابندر اشوفك على خير...مع السلامة...لما عرفت التفاصيل ضاق خلقي زياده كنت اتمنى ان الموضوع يكون اكبر يعني معقوله يسوي كل ذاك الفصل عشان تشابه اسماء؟! شي يحز فالخاطر صراحه صحيح ان خالد معروف عنه انه عصبي ولا يقدر يضبط نفسه بس هالكلام المفروض ماينطبق علي،على الأقل مو بهالطريقه اللي صارت!!بأختصار حسيت اني مثلي مثل غيري بالنسبه لخالد...
فاليوم الثاني جت الوالده تصحيني الساعه10الصبح ...يمه بندر اصحى خالد عند الباب...كنت متوقع ان هالشي بيصير وحاسب حسابه ..قولي له نايم...قلتها وانا اغطي راسي بالبطانيه..حاولت تسحبها من فوقي ... يوه اقولك خالد عند الباب وش بلاك ياولدي...على صوتي شوي... عارف انه خالد سمعتك من المره الاولى وانا اقولك نااااايم... تعجبت الوالده من تصرفي لاني اول مره اسويها لكني ما عطيتها فرصه عشان تستفسر, طلعت من غرفتي وانا نطيت من فراشي للشباك على طول, كنت اشوف سيارته لكن ماقدرت اشوفه حاولت منا ومنا مافي مجال.
صار يمر على بيتنا يوميا الظهر والليل وانا اتهرب منه واصرفه ولا عمري طلعت له,ودروا اهلي ان بيني وبينه شي اصلا واضح مايبي لها ذكاء, اما جوالي صار مايسكت سواء مكالمات من خالد او من الناس اللي يحاولون يصلحون بيننا و مسجات طول الوقت حتى اذا قفلته وفتحت الثاني او سوا كان يدق عليهم على طول,ما ادري العب على مين هذا خالد اللي يعرفني زين ويعرف كل ارقامي وحتى لو كان عندي رقم محد يعرفه فهالكلام ماينطبق عليه...

(5)
ذاك اليوم اشتقت له ورجعت بي الذكريات لايام الابتدائي وياكثر المواقف اللي حصلت لنا لان اللي يصادق واحد مثل خالد تتحول حياته لمغامره، مره في الصف السادس اذا ما خاب ظني كان الاستاذ مسوي مسابقه اللي يفوز بيصير"العريف"اللي ينظم الفصل اذا ما كان الأستاذ موجود..!! والله ايام وحشتني، المهم انا كنت ميت عشان اصير هالعريف اجي بدري، واشارك، وصاير مؤدب"ثقيل دم على قولة خالد"كان مايحب الاشخاص اللي مثلي يهتمون بالدراسه ويحبون المدرسين او يتمصلحون عندهم على قولته بس سبحان اللي جمعنا مع بعض كان يقول...ليش تبي تصير عريف؟!! ترى العيال بيكرهونك..ما اهتميت لكلامه ورديت..ابي اصير كيفي!! بعدين يا غبي بخليك تطلع وتدخل على كيفك..لا مو لازم انا اسوي اللي ابي حتى لو ماكنت انت العريف...المهم قبل لا يختار الأستاذ بيومين شريت بلونات وجبتها للمدرسه، خالد كان مريض و غايب بس انا والشله رحنا ومليناها مويه واول ما انتهى الدوام رميناها من فوق وانحشنا، يمكن بتقولون وين الولد المؤدب لكن انا بعد خالد صارت تجيني طلعات، توقعت الموضوع محد بيدري عنه لكن من بكره اول ما جيت الصبح قالوا لي العيال ان الأستاذ يسأل عن اللي جاب البالونات وسوى الحركه اللي امس، هنا انا قلت على العريف السلام، هالاستاذ مايصدق، رحت لخالد اللي متجمعين عليه كل العيال بما انه كان غايب امس، علمته باللي صاير وهو يدري انا وش سويت امس لاني قلت له السالفه واحنا جايين للمدرسه، قال خلاص ولا يهمك انا اتفاهم مع الأستاذ كنت اعتمد عليه كثير، لما بدت الحصه دخل الأستاذ وبنبره كانت تخلينا ننتفض..اللي رمى البالونات امس يوقف.. محد رد فالبدايه كان ماسك مسطره وش كبرها الله يسامحه...شوفوا لو ما تكلمتوا بعاقب الفصل كله...ناظرت خالد وانا بموت من الروعه ابتسم وغمز.لي بعدين وقف ...انا يا استاذ...قالها كنه محرر القدس!!قرب الأستاذ من عنده وسحب اذنه... والله اني عارف انه ما في غيرك ياخالد يسوي هالحركات، انت متى بتعقل ليش ما تصير مثل اخوانك او مثل صديقك بندر جننتني معك ياولد!!...
الصراحه ما توقعت ان خالد بيتحمل اللي صار بدالي؟؟! فعلا كنت مستغرب والدليل اني قاعد اتفرج وهو يتعاقب وانا ساكت!!طبعا الأستاذ كسر المسطره على يدينه يا حرام وانا احس ان عقلي بيطير من المنظر بعدين وداه للمدير...في نفس الحصه اختارني الاستاذ عريف وطبعا ما تهنيت فالخبر لاني ما ادري وش صاير مع خالد ذاك الوقت.. لما انتهت الحصه كان واقف قدام غرفة المشرف وحوله بعض الاولاد، يوم شافني ركض ولمني...احلىىىىىىى اخيرا وصلت اللي تبي مع وجهك...انا ما كنت اقدر اتكلم اشوف يدينه حمر من الطق ويفركها على جسمه ووجه الاسمر تخالطه حمره بسبب المرض وهو يضحك...قلت وانا متنرفز يمكن من الأحراج...خالد ليش سويت كذا انا ما قلت لك—قاطعني...يا بن الناس يعني اول مره انطق خلاص مشها يالله لازم نحفل اليوم...من بعد اللي صار عمرنا ما تكلمنا عن هالسالفه شكله نساها او ما اعتبرها شيء بس عمري ما نسيت صحيح اننا كنا صغار لكن فزعته هاذي لا يمكن انساها...
هالذكريات شوقتني له و رحت اتفرج على صورنا وعلى اشرطة الفيديو ,عجبني كيف كنا مره قريبين من بعض ولا في مكان يطلع فيه واحد الا الثاني جنبه,اغلب الاشرطه ما قد شفتها من قبل كانو حوالي العشرين شريط شي لسفراتنا وشي لطلعات البر وكلها شفتها في يوم واحد ورى بعض,اكتشفت اني طول الوقت اطالع فيه هو حتى فالصور عيني عليه بس, وطوال وقت عرض الاشرطه وانا اضحك عليه كان بطبعه خفيف دم محد فهالدنيا يخليني ابتسم او اضحك اوحتى يجنني مثل ما يسوي ,واحد من الاشرطه كان فيه مقطع اثر فيني كثير كنا مخيمين فالصمان واحد من الشباب يصور ومعه خالد, مروا على اغلب الشباب, اللي ينصبون الخيام واللي ينزلون الاغراض وخالد كان ماخذ دور المقدم عشان يتهرب من الشغل كالعاده هو واللي معه وقعد يسوي مقابلات معاهم ويستهبل عليهم وانا اضحك طول الوقت على طريقه كلامه وتعليقاته لما جا دوري كنت قاعد اشب الفحم ومعطيه ظهري قرب مني...عاد جينا الحين لاغلى انسان...كنت مشغول باللي معي...هلا هلا خلود,مسوي فيها مذيع يعني؟!!ما ودك تساعدني بدال هالخرابيط ازعجت العالم ياعمي...كان يوجه كلامه للكاميرا وحاط يده على ظهري وانا مو معطيه وجه ...هالولد اللي تشوفونه عرفته من يوم احنا صغار عزيز وغالي علي ولا ابدله بكنوز الارض...قاله اللي يصور: ما اقدر انا على هالكلام!! يا بعدي هاللي انت كاشخ فيه وتمدحه من الصبح حتى ما عطاك وجه وانت تتكلم... طالعني بنظرات ما انتبهت لها ذاك الوقت كانت تحمل معاني حلوه... كمل كلامه..ولله لو ايش يصير ما يتغير شي من غلاه... تجمعت الدموع وانا اسمع كلامه مع اني ذاك الوقت واضح اني ما انتبهت لـ أي كلمه جتني مشاعر متضاربه كنت اقول في نفسي "كلام رائع لكن ماطبقته ياخالد باللي سويته فيني", سكرت الفيديو ورحت انام او بالاصح احاول انام.
يوم الثلاثاء رجعت للبيت متأخر ولما وصلت عند الباب شفت سيارته, كان يستنى داخلها والله وحده اللي يدري من متى,وعلى ما يبدو لي من طريقة قعدتة وتكتيفة يدينه انه نايم لأن راسه مايل على جنب بس شكله متغير مره!! اول شي لحيته بدت تطلع,شعره تركه يطول بدون ما يرتبه وهاذي مو عادته ابد,واضح ان جسمه ضعف يعني كأنه واحد توه طالع من السجن...
وقفت سيارتي لكنه ما حس ما ادري وش اللي خلاني اصفق باب سيارتي بقوه عشان ينتبه .. يمكن ما كنت ابغى انتظاره يطول،فز من نومته و نزل بسرعه ،ناداني وصوته تخالطه بحه واضحه،وخالد من النوع اللي صوته يروح بسرعه اذا صارخ او اذا صار مريض حسيت بتعبه,لكني ما التفت له وسويت روحي ما اسمع ودخلت للبيت, الرجال قعد يطق الباب زي المجنون لدرجه اني خفت يصحي الجيران ويفضحنا قدام العالم وانا واقف عنده من داخل منزل راسي واسمعه ...افتح يابندر خلني اكلمك الله يعافيك لا تسوي فيني كذا يابندر... كان كل مره ينادي فيها باسمي بصوته اللي مره تسمع الكلمه ومره ماتسمعها اتألم بس من جد ما ادري وش قوة القلب اللي جت لي فجأة وخلتني اتماسك ولا اطلع له كل ما مر الوقت زاد عنادي, بعد فتره سمعت صوت جسمه ينسحب على بابنا كنه يقعد فالارض ,رحت اركض بافتح الباب خفت انه صار له شيء,لكن سمعت صوته يكلم نفسه لانه توقع اني دخلت داخل خلاص...سامحني يا بندر انا اسف والله اسف ... وانا اسمعه كنت كني اسمع اعتذار من طفل متأكد ان اللي قدامه ماراح يسامحه, جلست على الارض وحطيت راسي بين يديني وسندت ظهري للباب من داخل , وانا افكر في نفسي"معقوله اللي قاعد يصير معنا يارب؟!!"والله دنياغريبه، وجلسنا ساكتين، بعد فتره سمعته يتحرك ويركب سيارته.
بعد يومين جاني واحد من ربع الثانويه اسمه نواف كانت علاقته قويه مع خالد والى الحين وهم ربع بس هو مو من شلة الأستراحه ابتسمت اول ماشفته تذكرت على طول هباله هو وخالد ايام كانوا يرقصون سامري فالصف كانوا اجرأ اثنين وكيف جتهم تهزيئه من المدير خلتهم ينسون الرقص كله وسبحان الله وشلون تغير هالنواف وصار شيء ثاني رغم ان خالد لازال على جنونه...
ماقال شيء عن الموضوع لكن جيته صدقوني كان لها اثر في نفسي ذكرتني بأشياء كثيره واظن ان هذا مقصده من الزياره..


***************************(6)
جاني مسج من خالد فاليوم الي بعده وكان مقطع من اغنيه تعجبنا ودايم نرددها يقول المسج:
*ما جيت ابسأل جروح او سبه غيابي..
المشكله"اعرفـــــــك" اكثر من أسرارك..
وأكثر من جــــــــــــروح قلبي ورقه اعتابي..
((قلي بعد هالـــــفراق وش آخر اخبارك))؟؟!!

المسج اثر فيني لان خالد مو راعي مسجات ولا يعترف فيها، رجعت بي الذكرى لايامنا الحلوه وقررت ارسل له مسج كرد من نفس هالاغنيه بعد بتعديل بسيط مني:
*ماهي غريبه اذوق وانطفي بنارك
ولا هي بعيده اشوف الجرح باحبابي
حاولت أنسى ولكن ضاعت اعذارك
مادام جرحك ((يالرمت))مكتوب بكتابي!!

يوم الخميس اتصل سامي:هلا بندر...فرحت بمكالمته ذكرتني بالجمعات فالأستراحه...هلاااااااااااااااا سامي وش الاخبار...تسلم, وش دعوى يارجال وين الناس اشتقنالك...تشتاقلك العافيه ياخوي...فاضي اليوم نمرك انا والشباب بين عشوين؟...الساعه المباركه حياكم الله والله ودي بشوفتكم...اجل نشوفك اليوم انشالله... لا تطولون صلو في مسجدنا مع السلامه.
جو الشباب على موعدهم على انهم ما صلوا عندنا ورحت افتح لهم, ماشاء الله كان الكل جاي ما ادري وش الغلا اللي جا لي فجأة, ولما اكتملت المجموعه وانا ارحب فيهم قبل لا اسكر الباب دفعه واحد فتحته بسرعه وقبل ما اشوف مين قلت..السموحه ماشفتك يـــا...كان خالد!!!ما عرفت وش المفروض تكون ردة فعلي ،لما تلاقت عيوننا بعد كل هالغيبه حسيت كني بطير من الفرحه في داخلي وانا احاول بكل ما اقدر اني اخفيها واني ما انط عليه واحضنه,ابتسم ذيك الابتسامه الحلوه واللي وحشتني حيل وهو زي ماتقولون كنه واحد غرقان ورد النفس...فتح يدينه عشان يلمني لكني بكل جمود مديت يدي وصافحته بدون أي كلمه!!قبل لا يصير في خاطركم شيء علي تذكروا اللي سواه فيني وش ممكن تكون ردة فعل اي احد فيكم، فالأخير احنا بشر ولنا مشاعرنا وانفعالاتنا اللي مو دايم لها تفسير ولا نقدر نتحكم فيها مهما كانت مكانة الشخص بالنسبه لنا..
الشباب سبقونا للمجلس,اصلا كان واضح القصد من هالزياره اكيد خالد هو اللي جابهم كلهم,توجهت للمجلس لكنه سحبني من ذراعي ناحيته بقوه, وبصوت هامس يحمل كل معاني الندم والرجا...معقوله ما وحشتك؟!!.. مارديت عليه وكمل كلامه...لمتى يابندر بتظل تتجاهلني, كلمني رد علي,هزئني اوحتى اضربني انا راضي واستاهل لكن لا تسوي فيني كذا حرام عليك والله اني تعبان وفهمت غلطتي وعارف اني ما اقدر اعوضك لكن هالعقاب والله فوق طاقتي يكفيني يابندر انت بالذات تدري اني مالي غنى عنك...كان قلبي يقول لي...ياخي خذه بحضنك وانسوا كل هالالم لكن الله يلعن ابليس ،العناد والكبرياء سيطروا علي والموقف اللي صار فالاستراحه بين عيوني, قلت بكل برود وانا ابعد يدينه عني بهدوء...جعل يدي تنقص قبل يجي اليوم اللي تنمد فيها عليك ماضربتك وحنا صغار تبيني امدها الحين؟!! "كانت نغزه على حركة الأستراحه", يالله الشباب ينتظرون داخل... نزل راسه بانكسار ودخلنا,واضح انهم كانوا يحاولون يلقطون شي من الحوار اللي دار بيننا,لكن اول ما دخلت كل واحد التفت على الثاني وسوى روحه متعمق في سالفته.
بديت اصب القهوه ومسك خالد الدله الثانيه,كانت هاذي عادتنا لما يزورني احد دايم نفزع لبعض بس هالمره ماكنت ابي أي مساعده منه,واللي زاد قهري ان خالد باللي صار خلانا فرجه لخلق الله ومحل شفقه الجميع وهذا اللي ماكنت استحمله..قلت لماجد اول واحد بصب له بصوت واطي وانا اضغط على اسناني..رح قله يترك الدله ومشكور ما نبي منه شي...كملت صب وسمعت ماجد يقول لخالد اللي بدى يصب من الجهه الثانيه :هات الدله عنك...لا استرح تسلم انا ابي اصب مع رفيقي...وشدد على اخر كلمه يبيني اسمع...لكن بمزحه بايخه وقاسيه في نفس الوقت يرد ماجد:هذا اول يالحبيب زين انه سمح لك تدخل لبيته معانا هات عنك بس...وقعد يضحك..حسيت انه جرحه وتعمد يهينه ولولا اني حكمت عقلي ذيك اللحظه وتذكرت انه في بيتي كان صفقت وجهه بالدله اللي معي,صحيح ان ماجد كان معروف عنه انه انسان فظ وعربجي ومزحه زي وجهه ولا يثمن كلمته او حتى يفكر فيها قبل يقولها,لكن لو في ظروف غير هاذي الله العالم وش كنت بسوي فيه... هذا اذا ما أدبته اول مايطلع خالد ادري انكم تقولون طيب هذا اللي انت تسويه مع خالد بس ما ادري اذا قد جاكم هالشعور انه ممكن اجرح او ازعل انسان غالي علي بس لو احد ثاني حاول يفور دمي و اعصب!!!.
المهم سويت روحي ما سمعت وكملنا صب,جلسنا, اللي يسولف واللي يضحك كنه ماصار شيء الا انا وخالد كنت امر بعيوني عنده كل شوي, ولأني افهمه من عيونه وبدون أي كلمه عرفت انه ينتظر الشباب يمشون.
اذن العشاء وقاموا الجماعه الا خالد وكنت متوقع هالشي بعد, ودعتهم وشكرتهم على الزياره,عند الباب قال لي سامي بيني وبينه:والله انكم مفضوحين الغلا واضح بينكم حتى لو حاولتوا تبينون العكس والله الله في خالد وانت عارف اكثر مني انه مافي مثله انت العاقل ولا تغلط غلطته انتم بدون بعض اسمح لي ما تسوون شي , ولا تخلون شي تافه يهدم احلى صداقه شفتها في حياتي,اصلا والله يابندر انه يحز في نفسي اني اوصيك عليه وانتم اللي من اول نخاف نقول شيء عن واحد منكم قدام الثاني...شكرته وقلت..قلبي ياسامي ما يزعل وانت تعرف خاصه على خالد بس الأمور احيانا تطلع من يد الواحد والله يخليك لا تفتح معي الموضوع مره ثانيه تراه علي اصعب مما تتخيلون..مع السلامه..
ودعته, ولما التفت لقيت خالد واقف عند الباب الداخلي ينتظرني, قربت عنده بدون أي كلمه وكتفت يديني, بدى بالكلام على طول... بندر سامحني يااخوك ترى كل هاللي قاعد يصير ماله داعي, انا تهورت وقلت كلام ماكان لازم اقوله, وجيت اليوم اعتذر لك واحب راسك بعد,"تكفى"خل عنك العناد وريح بالي ترى ما صارت المسامح كريم يالغالي...سكت فتره اول مره اسمع تكفى منه كانت طالعه قويه منه لكني حاولت اختار كلماتي قبل لا اقوله شيء..آسف يا خالد صدقني ما اقدر انت حطمت كل الاشياء الحلوه لك في داخلي بعد ما سمعتني ذاك الكلام والا نسيت؟!!اذا انت نسيت تراي اذكر كل كلمه قلتها وتتردد في بالي كل يوم, ذاك الكلام اللي زي السم واتهمتني باطل بعد بدون ما تحسب لصداقتنا أي حساب,يا خالد انا للحين احس اني في حلم مو قادر اصدق اللي صار, انت من بد كل هالعالم تبيعني انا في لحظه؟!! ما كان العشم والله... وبصوت مليان الم ...يعني ايش يابندر 16 سنه صداقه معقول ما قدرت تلقى لي لحظه وحده تشفع لي عندك وتخليك تسامحني؟؟؟!!..بعد كلامه انهمرت الذكريات من كل جهه لكني حاولت اتجاهلها بكل ما اقدر وانفجرت... اسأل نفسك قبل لما اهنتني قدام البشريه بدون ما تعطيني حتى فرصه اني ادافع عن نفسي انت يا خالد حتى ما حاولت انك تظن فيني خير وبعتني بسهوله , نسيت كل شي يا خلود, نسيت اللي اذا ضاقت بك الدنيا يصير لك الدار ويضيق خلقه لين تنفرج عليك, ونسيت اللي صانك وحفظ اسرارك طول عمره، نسيت اللي ما يرضى احد يغلط عليك وانت بكل بساطه تجرحه وتظلمه وتحرجه قدام الكل, ياليتك قدرت معزتي ومحبتي الكبيره لك, حركت يديني بعصبيه... يا خساره يا خالد انا بس ابي اعرف ذنبي, قلي ليش سويت معي كذا؟؟! عمري غلطت عليك بكلمه؟ او حتى ضيقت خاطرك بحركه؟ تجرحني بهالسهوله ليه؟ علمني ياخالد لا توقف ساكت تكلم يا اخوك؟!! المشكله هنا ان الغلطه جت من غالي وهذا اللي يخليني ما اقدر امشيها...عضيت على شفتي وانا اشوف ملامحه تتغير...تجاهلته وكملت...تدري وفر علي كل الكلام اللي بتقوله لانه ما عاد ينفع شي الحين اللي انكسر ما يتصلح ما عاد لك بقلبي مكان ليتني ما عرفتك ياخالد... كنت اقول هالكلام عشان ارد له اللي صار فالاستراحه وداخلي يصرخ...يا مكبر كذبتك يا بندر انت لو احد سألك وش دنيتك مايجي في بالك الا أهلك وخالد... سكتنا شوي وخالد يهز راسه وعيونه تتلامع, والف صوت في داخلي يقول له:تراي مثلك يالغالي عزيز وداخلي منهار, وعشان انهي هالمشهد الحزين قبل لا اضعف قدامه قلت: في بيت شعر سمعته مره وما اظن ان معناه وصل لي او يمكن المشاعر اللي وصفها الا اليوم:

الجرح لا جــا من اغـــراب عــــــــــــادي
بس الجرح مـوت الجرح لا جا من احـباب*1
لا جا من احباب ياخالد وانت ياخوي ما قصرت كفيت ووفيت معي فهمتني البيت بطريقه ما اظن الا متأكد ان ما احد يقدر يوصلها مثلك, ما ودي اقول اني نادم على الماضي لاني فعلا ما ندمت لكنك خيبت ظني فيك...رفع براسه وقرب يده من اذنه من قسوة الكلام اللي سمعه...كافي يا بندر كافي انا عارف انك دايس على قلبك وانت تقول هالكلام، فإذا كنت تبي تثبت لي شي او حتى لنفسك صدقني تراك اثبته, واذا كنت تحس انك مخدوع فيني او مصدوم فأنت الحين بأصرارك على الزعل تسوي مثلي ومهما صار او بيصير ترى غلاك في قلبي هو الاول دايم وعشرتك عمرها ما تهون عندي, وبالنسبه لك انا اكثر انسان فاهمك في هالدنيا عشان كذا بصبر عليك شوي لكن ما راح استسلم وعارف انك مهما تقسى وتبعد طيبتك وحنية قلبك بترجعك لخو يك, وعارف بعد اني ما اهون عليك... همست وعيوني فالأرض: وش اللي يخليك متأكد لهالدرجه؟! مثل ما هنت عليك في يوم بتهون علي اليوم !!...طالعني بنظره يائسه وحزينه... الله يسامحك يابندر والله ما اظن انه يفرحك انك تجرح خويك بهالطريقه...، اذا كنت قادر تنسى وتلغي احلى سنوات من طفولتك وشبابك فانت بتقدر تنساني اما بالنسبه لي فانا ما اقدر استغني ولو عن لحظه من ذكريات عمري معك لاني ما اقدر انسى حياتي كلها ... رديت بسخريه واللي سويته فالأستراحه وش تعتبره؟؟مثل مانسيت اللي بيننا بسوء ظن انا نسيته بهالجرح، و ادري انك ماتستحمل فكرة ان اي احد يزعل منك لكن انا---...قاطعني...يابندر انت مو اي احد وراك تكلمني كذا؟! فتح عيونك تراي خلود... فعلا انا مو اي احد والدليل سواتك فيني...ابتسم بألم...لا حول ولاقوه الا بالله ما توقعت العناد يوصل فيك لهالدرجه، على كل حال الموضوع الحين صار في يدك وتقدر تحكم فيه بالطريقه اللي تبي بس اتمنى انك ما تسوي شيء تندم عليه، ولا تغالط نفسك اكثر من كذا انت تعرف من انت بالنسبه لي وهالعالم اللي حولي بدونك ما ابيهم وما اقدر اتخيل ان اللي كان بينا بيكون ذكرى في يوم من الأيام انت متخيل هالشيء وانت تقول هالكلام؟!!...هزيت راسي...محد يموت قبل يومه الدنيا كذا والحمدالله على نعمة النسيان... اقامة الصلاه.. وودعنا بعض وطلع.


********************(7)
بعد هالموقف حسيت براحه كبيره, حسيت ان احنا متعادلين الحين او يمكن كان سبب الراحه اني تكلمت معه بعد فتره اعتبرها في نظري طويييييله وطلعت كل اللي_ في خاطري, اصلا ما عاد فيني صبر على فراقه واكيد انه حس بغلطته وهذا اللي كنت ابيه وقررت اني انسى اللي صار خلاص و ارد عليه اذا دق المره الجايه, واسامحه واطلب منه يسامحني بعد,يعني حتى انا قلت كلام ما كان لا زم يطلع مني وقررت ان احنا نسافر بعد عشان نعوض كل الايام اللي بعدناها عن بعض.
علمت ريم بالسالفه كلها كانت مستغربه وهي تسمعني:تصدق يابندر هاذي والله العالم عين وصابتكم اجل معقوله خالد يسوي اللي سواه لا والأغرب انك قويت نفسك ولا سامحته,لا لا اسمح لي هالكلام ما يدخل العقل..!! ..ضحكت وانا اسمعها وقلت...من جدك ما سامحته؟؟!!اصلا من اول ما شفت اسمه في جوالي سامحته على طول وبيني وبينك قلبي ما قوى يزعل عليه من الاصل لكن الظاهر اني كنت امثل على نفسي قبل لا امثل على احد!! ثانيا المسأله بأختصار كانت رد اعتبار, لكن تعرفين حنا مو زيكم انتم يالبنات اذا زعلت وحده الثانيه تعتذر على طول غالبا والثانيه بعد تسامح بسرعه وهذا في ظني اللي يخلي صداقات البنات اجمل واطول بعد اما الشباب فالكرامه والعزه تتغلب على العواطف الثانيه دايم نحس ان احنا مو بحاجة احد والاعتذار بعد من اصعب الاشياء علينا هاذي طبيعتنا اللي حطها ربي فينا, هذا وانا وخالد نعتبر طفره جينيه بالنسبه لصداقات الرجال ،الله يعين انشاءالله انا الحين بس استناه يدق خلاص ماعاد فيني صبر...طالعتني بتعجب... والله انك غريب يابندر طيب ليش ما تدق انت عليه؟!!...اوووه انت غبيه والا تتغيبين وش قاعد اتفلسف عليك من الصبح, اقول لك ما اقدر صعبه علي وبعدين خلود ما يقدر يصبر بعد اكيد بيدق هو قال لي انه بينتظر علي شوي...عطتني نظرات ما ادري وش تبي وقالت.. الحمدالله والشكر لحد يسمعك بس وبعدين لا تسوي روحك فاهم البنات لانك ماعندك سالفه وفي شيء ابيك تفكر فيه تتوقع لو الوضع كان العكس خالد كان بيسامح والا بيسوي مثلك؟!!..وطلعت...وقعدت افكر في كلامها واللي اجابته كانت واضحه بصراحه وهي بعد كانت تعرف الاجابه لان مواقف قديمه تبين ان خالد حتى لو كان صعبه عليه يسامح ومن النوع اللي زعله شين بس انه يسامحني انا دايم مهما صار..لكن هالكلام مايهم الحين..


مر كم يوم وخالد للحين ما دق لكني يوم الأربعاء شفت ميه مس كول من طلال ورجعت ادق عليه قلت اكيد ان خالد يبيه يتوسط بيننا لانه يعرف معزة طلال عندي لما فقد الامل فيني , وبعدين اناخلاص وصلت عندي ابي كل هالسالفه تنتهي ودقيت وانا فرحان...مرحبا طلال... هـ...هـ لا.. بندر..صوته ابدا ما عجبني واختفت الأبتسامه...طلال خير انشاءالله عسى ماشر,معليش ماكنت عند الجوال قبل شوي بغيتني في شي؟!... الرجال بدى يتنهد وحسيت ان في شي مو زين صاير ...بندر انا لي ساعه احاول ادق عليك لكن ----....طلال ياخوك لا تلعب باعصابي قلي وش فيكم؟!...انا ذاك الوقت الهواجس لعبت فيني لعب قلت ابوهم توفى لانه كان رجال كبير فالسن ومريض من زمان والا اخوهم الصغير تركي اللي كان عنده ربو حاد جاه شي, كل شي مر في بالي وكنت طول الوقت افكر بس في خالد وشلون بيتقبل هالاشياء وانا اعرف غلا ابوه واخوانه عليه وعزمت اني انسى كل اللي صار و اوقف معه في محنته كل هذا قبل لا ينطق طلال بحرف ... خـالـد يا بندر-----!! لما سمعت الاسم حسيت ان قلبي وصل حلقي ولا عاد قدرت اتكلم او حتى اتنفس,وبصعوبه...خـ-خـ--الد وش---فيه حراااااام عليك تكلم؟؟!! كنت انتفض وركبي ما عاد تشيلني... خالد يطلبك الحل يابندر ادع له بالرح---وخنقته العبره,اما انا فكنت ساكت,ولاعاد اشوف شي قدامي قعد يتكلم كلام ما فهمت منه شي اللي قدرت استوعبه انه الظهر صار له حادث والظاهر انه كان متوجه لبيتي وتوفى فالمستشفى...قفلت الجوال, كنت واقف وبحركه بطيئه قعدت على الارض وبعدين انسدحت عالأرض وقعدت اناظر السقف لفتره طويله ويدي على راسي فقدت الاحساس بكل اللي حولي, لا دموع ولا كلام ولا صدر مني أي ردة فعل..

طلعت بسيارتي امشي فالشوارع بدون هدى ما وعيت الا انا فالمجمعه ديرة خالد اللي تبعد عن الرياض حوالي الساعتين وياما زرناها سوى, وقفت السياره قدام فلتهم اللي يجونها ايام الشتاء، لما جا الليل رجعت للرياض..
دخلت البيت ورحت لغرفتي وقعدت اتقلب في فراشي تصوروا كل هذا بدون أي احساس الظاهر اني ما كنت مستوعب المصيبه اللي انا فيها, لما جا الصبح رحت لبيتهم على طول وقبل اوصل دق علي طلال... الو...هلا بندر, اذا ودك تسلم عليه وتودعه قبل الدفن تعال للمغسله اليوم قبل صلاة العصر..


ما رجعت للبيت رحت للمغسله وسألتهم قالوا ما بعد وصل من المستشفى, تبون الصراحه كان للحين عندي امل ان السالفه كذب او فيها غلط زي حال الكل وقت المصايب ماودهم يصدقون, واني بشوف خالد بعد شوي، قعدت عند الباب الى الساعه 2,30والا اشوف سيارة اسعاف جايه ووراها سيارات اخوان خالد كلهم، وقف الأسعاف وفتحوا الباب الخلفي، شفت طلال وباقي اخوانه عند السياره لما شفتهم يطلعون طرف شي ابيض شهقت ورحت اركض فالشارع, كنت احاول ابتعد عن المكان بقد ما اقدر, مشيت لين وصلت اخر الشارع وجلست على رصيف واحد من البيوت, لما هدت نفسي شوي رجعت للمغسله كان لازم اواجه الواقع لو كان قاسي..
************************************************
(8)
دخلت وانا شماغي على كتفي وماسك عقالي في يدي وحالي دمار, لقيت مو بس اخوانه حتى اعمامه واخواله وزوج اخته بعد، الكل كان متواجد, لما شافوني تغيرت وجيههم وحضنوني بحراره, كلهم اعرفهم ويعرفوني زين عرفت اني ذكرتهم فيه لما شافوني حتى واحد من اخوانه ما رضى يتركني كنه بتعلقه فيني يحس انه مع اخوه خالد والغريبه انهم كانوا يعزوني بدال ما انا اعزيهم , المهم جاني طلال وعلامات التاثر باينه في وجهه..تبي ادخل معك؟؟؟احنا تونا طالعين... قاطعته...لا لا بدخل لحالي... كانت هاذي اول جمله انطقتها من اول ما دخلت للمغسله حتى لما عزوني ما رديت عليهم..
تعوذت من ابليس وبديت اذكر الله و دخلت في الغرفه اللي دلوني عليها كانت فيها روايح غريبه الريحه اللي قدرت اعرفها هي ريحه المسك والصابون, الظاهر ان الرجال اللي كان فالغرفه هو المغسل, وقفت في مكاني عند الباب ماكنت عارف وش اسوي؟!! قرب جنبي و كان شخص يميل للقصر ,ابيض, لحيته طويله وصاحب ملامح سمحه, حط يده على كتفي وحس بالرعشه اللي تهزني كنت اطالعه بنظرات استغاثه... وبصوت وقور قال...عظم الله اجرك ياولدي واحسن الله عزاك ,الله يلهمكم الصبر والسلوان, قبّل جبهته وادع له بالثبات عند السؤال, وباللي يجي في بالك... كنت اطالعه وانا اشهق بدون دموع وطلع من الغرفه..
شوي شوي قربت من عنده وشفت منظر في حياتي ما مر علي مثله, حسيت الدم وقف في عروقي لما شفته انهارت كل حصون المقاومه والصبر اللي بنيتها , ما ادري وشلون اشرح الوضع كانوا حاطينه على شي زي الطاوله ومرتفعه عن الارض بمسافه قليله ,مغطين جسمه بشراشف بيضاء الا وجهه وجزء من صدره, كانت عينه وجزء من جبهته متحوله للون الازرق من فعل الصدمه اما خده ورقبته كانت فيها جروح بسيطه ,لكن واضح ان تركيز وقوه الصدمه كلها جت على صدره, كان زي اللي نايم بس بدون أي اثر للحياه والظاهر اني ما صدقت الخبر لين شفته بعيوني, فقدت اعصابي في ذيك اللحظات وصرخت صرخه مريعه، حضنته بين يديني وقعدت اصيح بحرقه زي الاطفال, دخلوا علي بعض اخوانه يوم سمعوا صوتي وحاولوا ياخذونه مني لكني كنت متمسك فيه بقوه.. يابندر قل لا اله الا الله لا تسوي في نفسك كذا ترى ما يجوز...وانا اصرخ من كل قلبي احس اني فقدت عقلي للحظات... اتركوني خالد يا اخوك رد علي , كلمني ياخالد ,طلال خالد ليش بارد؟؟ليش تاركينه كذا؟؟ ليش ماغطيتوه؟؟ حرام عليكم... نزل راسه وانسابت الدموع من عيونه...انا الله وانا اليه راجعون...تعال معي يا بندر تعوذ من الشيطان وخلنا نطلع...وانا احاول اكلمه..ياخوك وين رحت وتركتني؟!!انا من لي غيرك ياخالد؟؟.. ودموعي سيول واخوانه يحاولون يفكون يدي عنه..
وبعد جهد قدروا ياخذونه من بين يديني بعد ما بين اثر ضغطي على جسمه، وانا منهار وفي حال مايعلم فيها الا الله سبحانه, كل لحظه انادي بأسمه..جابوا لي كرسي وقعدوني عليه وانا كني معهم ومو معهم... واحد من اخواله شيخ كبير من الناس اللي فيه خير وصلاح والله هاديهم قعد يمسح على راسي وصدري ويقرى علي قرآن لين هدت نفسيتي شوي ناظرت فيه...خالد صدق راح يا خال؟!...شد على يدي وهز راسه ورجعت دموعي ويدييني على راسي وانا اهز على الكرسي..مايصير يا خال والله ما يصير...قعد يستغفر وانا على حالي، كنت مفجوع الله لا يفجعكم في حبيب...
رحنا نصلي عليه كان المسجد مليان واللي برى اكثر من اللي داخل, كان الله يرحمه رغم صغر سنه انسان محبوب من الجميع صغار وكبار, وفي المقبره مع الزحمه وكل هالعالم اللي حولي الا اني حسيت بوحده رهيبه,كنت بعيد عن الجماعه ما ابي احد يعرفني او حتى يشوفني رغم اني عارف ان الكل يسأل عني تلثمت بشماغي ولبست نظارتي الشمسيه ووقفت بعيد عنهم.
جاني تركي واللي كان له غلا كبير عند خالد بحكم انه الصغير وكان دايم يقول انه رغم صغر سنه الا انه كان حكيم ويفهم اكبر من عمره بكثير,كان عمره تقريبا ذاك الوقت12سنه سلم علي وحضنته وانا احاول اتماسك قدامه ولكم ان تتصورون مقدار صعوبه الأمر خاصه انه يشبه خالد كثير قال لي:بندر خالد كان يعزك اكثر من أي واحد في هالمكان وكلهم مجتمعين حوله الا انت!!لا تتخلى عنه في هاللحظات عشان ما تندم باقي حياتك, تشجع وادع ربي انه يصبرك بس لا تحاول انك تهرب من احزانك بهربك من هالموقف... كانت كلمات عظيمه اثرت فيني وشفت في هالطفل اللي فقد اخوه في حادث مفجع الصبر بمعناه الحقيقي,لميته لصدري مره ثانيه وكنا نواسي بعض بخسارتنا الكبيره, مسكت يده وتوجهنا لهم...استعدوا للدفن وسمعت اخوانه ينادوني...قلت لهم اني انا اللي بنزل فالقبر واحطه ونزل معي واحد من اخوانه يساعدني...سلمونا اياه من فوق وحطيته وانا ادعي له واذكر الله طول الوقت,كان ودي لو اجلس معه اوحتى اشوفه واسمع صوته لاخر مره لكن عرفت ان شمسي غابت خالد ((الرمت)) غاب من حياتي وهالحياه للابد.

**************************
(9)
بعد وفاته رجعت ذاك الطفل الكتوم المنطوي على نفسه...انا تركت قلبي معه لما تهاوشنا,ولما راح..راح قلبي معه, ابتعدت عن الناس والعالم فتره طويله كنت فاقده بشكل خيالي واللي يحز في خاطري اكثر لما اتذكر انه توفى واحنا بعيدين عن بعض يعني16سنه عمرنا ماتفارقنا وقبل اقل من شهر على وفاته نتهاوش!!! اللهم لا اعتراض راضي بقسمتك وحكمك يارب,لكن املي فيه انه كان فاهمني وعارف اني ما اقدر استحمل زعله وقلبي ما يشيل عليه واني زي ما قال مهما حاولت آكابر وانساه مصيري ارجع له..
بعد عدة اسابيع على وفاته عطاني طلال دفتر وقال:هذا كان من اغراض خالد الله يرحمه واظن ان من حقك تتطلع عليه وتحتفظ فيه بعد اذا ودك, لما شفت الدفتر تذكرته على طول كنا يوم انا واياه في المكتبه بنشتري كتب للجامعه وشاف الدفتر وعجبه وقلت له هذا مايصلح للمحاضرات ياعمي قال عارف بس تدري وش باستخدمه فيه؟! بكتب فيه مذكرات لكن مو أي شي الاحداث المهمه في حياتي بس, اذكر اني ضحكت عليه من قلب وقلت له انت من جدك؟!!والله ما تصلح لك هالحركات ونسيت الموضوع بعد كذا,فتحت الدفتر وكان مكتوب بالصفحه الاولى:

بالرغم من اني اعتقدت ان اليوم الذي ستملئ به هذه الصفحات لن يأتي ابدا, الا انه اتضح لي عكس ذلك.
وعدت يوماً اني لن اكتب به غير احداث مهمة من حياتي ...احداث تستحق الكتابه وقد جاء هذا اليوم بالفعل...فاليوم أخطأت في حق صديق عمري ورفيق طفولتي.

بعد هاذي الكلمات القليله بعددها والكبيره بمعناها في قلبي لقيت بعض ابيات الشعر:
بندر حرك ضميرك واعترف اني وفيت
سيرة النكران هاذي فضها واذكر غلاي
اعترف بسك تكابر منت واصل ما بغيت
ريح عنادك وخلنا انتفاهم باللي جـــاي
لا تحاول تمتحني ما خذيت؟!الا خذيــت
قلبي الغالي بلاش وما تركت الا شقاي
صح في لعبة غيابك زاد شوقي وابتليـت
بس لاتظلم تراني ما صبرت الابرضاي
ما دريت ان المحبه قاسيه لكن دريت
خطوه المليون جرح وافقت دربي وخطاي
كم تذكرت الليالي وانت يا خلي نسيت
ومن تناسى صدق ذاته ويش اقول الله معاي
يابني آدم تلاحق خاطري لامن طريت
خلك الطيب وحاول تكسب الوقت بوفاي
لا تخليها معاند أن قويت او ما قويت
القوي الله((ياعمي)) وانت تدري عن مداي*2

وبعد كذا انهى كتاباته بهالبيت:
خسرت ولا ربحت الا قليل من الصبر وجراح
ربحت بندر وان خسرت العمر عسى تحييني اوراقي*2

وهذا كان اللي مكتوب بكل هالدفتر بس,الدفتر عنده قبل اكثر من اربع سنين وهذا اللي مكتوب فيه, ولاشي اعتبره مهم في حياته الا هوشتنا, ما ادري اذا كان حاس بموته من قبل والا البيت جا كذا المهم لميت الدفتر لصدري وقعدت ادعي له.
كنت اقعد مع طلال بعض الايام ومره قال لي ان في آخر سفره لخالد مع اهله واللي ماراح معهم طلال فيها قال له: ماوصيك على بندر ياخوي لا تخليه يحس اني مو موجود خلك حوله دوم..كمل كلامه وانا ماسك دموعي اللي اتعبتني...ادري انه مافي شيء يخليك متحس انه مو موجود مثل ماقال وما في شيء يعوضك او حتى يعوضنا بس ترانا كلنا حولك حتى ابوي يسأل عنك دايم...رديت وانا اغالب الدموع وافكر في حال اهله من بعده...ماتقصرون... حاولت اشكي له شوي يمكن اخفف من هالألم الفظيع اللي احس به.. والله انه ماعاد لي قلب ياخالد--.. يوم حسيت اني غلطت بالأسم خلاص انهرت وفضحتني دموعي..
رجعت للبيت وبعد فتره دخلت ريم علي تحاول تواسيني وتطلعني من دوامه الحزن اللي انا فيها...بندر يا اخوي كل شوي والله اني خايفه عليك..كانت جايبه عشاء لكني صديت عن الأكل...طلبتك ياريم والله ما اشتهي شي...هزت راسها..ياخوي فضفض وطلع اللي في قلبك انا اختك وحاسه فيك ما يصير تكتم كل هالالم في قلبك...رفعت راسي... وشلون تبيني اتكلم يا ريوم الوحيد اللي قدرت اشكي له في يوم راح وخلاني خالد راح ياريوم وتركني في هالدنيا لحالي...استغفر ربك يابندر هالكلام ما يطلع من واحد مثلك انت انسان مؤمن وتعرف الله, وبعدين حرام عليك تضغط على نفسك وتحملها هموم فوق طاقتها تتوقع خالد الله يرحمه يرضى لك بكذا..امتلت عيوني بالدموع زي كل مره اسمع فيها اسمه وانا احاول اخفيها عنها..مسكت يدي..لا تحاول تخفي دموعك ياخوي طلع اللي في قلبك اللي فقدته مو شوي، انا ياخوي جايه اقول لك ترانا كلنا معاك وحولك في أي وقت تحتاجنا فيه... ياريم انا شفت الدنيا على يده لكنه ماعلمني اعيشها بدونه، انا خسرت القلب الكبير، من بعده صرت اشوف كل شيء حزين، الدنيا ياريم ماعاد لها طعم بدونه، ليت الزمن يرجع و--ضغطت ريم على يدي...لا تعذب روحك ياخوي كلمة ياليت ماتنفع وهذا قدر الله..
ورغم مرور السنوات على وفاته الا اني عمري ما نسيته اوحتى راح من بالي عايش داخلي دايم وادعي له بالرحمه والمغفره كل الأوقات, رحت للعمره ادور الراحه النفسيه بالقرب من الله تذكرت وانا اطوف لما اعتمرت انا والشباب العام الماضي، قسمنا نفسنا عشان الزحمه كان خالد ماسك يدي و يمشي فيني بين الناس وانا اقرى من كتاب الادعيه وهو يأمن، ولما رحت اشرب من زمزم تذكرت شكله وهو يصب المويه على راسه وجسمه كنه في بيته واحنا نقوله ترى وراك سعي ما راح تعرف تمشي واحرامك مليان مويه و يرد "واذا صار؟!!والله ماعندكم سالفه هاذي بركه يالله سوو مثلي بلا دلع" ،وفي السعي لما شفت العربات تذكرته لما كنت اجره بالموت عشان ما يوقف وهو يأشر على العربات"الله يخليك خلنا نقعد شوي خلاص يابندر رجلي ما تشيلني خلنا نرتاح شوي والا شرايك نستأجر عربه وانت تدفني؟!" ...وانا اهاوشه على كلامه واجره بالقوه...خالد تراك اذيتني قسم بالله البزران مايسوون مثلك...ولما جينا نتحلل كلنا قصرنا شعورنا الا هو حلق شعره كله، كنت دايم في اي عمره اقصر شعري لكن هالمره حلقت.. واخيرا لما رجعت حافي للفندق زي ما كان يسوي خالد تذكرت لما خليناه ينام على الأرض فالغرفه وشكله وهو يهمز رجله بعد تعب العمره وهو يتأفف: ياسلام عليكم بتنوموني على الأرض هالسنه بعد؟؟ ترى ما بيني وبينكم الا شهور، حرام عليكم مو كل مره بندر وسامي ياخذون الأسره في هالغرفه المفروض يصير فيه تناوب!! فالغرفه الثانيه يتناوبون مو انتم يالظالمين...بس محد عطاه وجه ولما قام الصبح كان يشتكي من ظهره وانا اضحك على طريقة مشيته...امش زين لا تنصب والعمره الجايه انشا الله بتنام عالأرض بعد رد علي..هين يابنيدر ان ما خليتك انت تنام على الأرض انا مب خالد... سبحان الله دنيا دواره.. هالسنه اعتمرت لحالي ونمت عالأرض وتركت الأسره فاضيه، ولما قمت الصبح وحسيت ان ظهري يوجعني ابتسمت بحزن استقبلت القبله وقعدت ادعي بحراره ودموعي تنهمر...يارب اغفر له تراي احبه فيك، ياربي ارحمه و برد علي وامسح على قلبي واجمعني فيه..كانت هالعمره الله يتقبلها لخالد...


************************
(الأخير)

اقترح علي شيخ فاضل من اهلنا اني احفر له بير في وحده من الدول الأفريقيه الفقيره واسميه بأسمه الله يرحمه عشان ارتاح بعد وعلمني عن الأجر الكبير اللي بيجيه انشالله وفعلا سويت هالشي ،كنت تعبان من جد اشوفه في كل الوجيه واسمع صوته في كل الاصوات وذكرى اخر يوم شفته فيها ما تفارقني ابد...
في عيون الناس اشوف اشياء كثيره، بعضهم يذكروني دايم ان خسارتي مو بسيطه وبعضهم وحشتهم شوفتنا مع بعض وهذا يتعبني زياده..
واللي يصعب الوضع علي بعد اني وين ما التفت القى ذكرياته ماليه حياتي، اثاث غرفتي اللي اخترناه سوى لما انتقلنا لبيتنا، سيارتي اللي اختار لونها وساقها قبلي وعطره اللي للحين في درجها!! ياغلاة اللي راح...
لكن كل ما اتذكر ان ذاك الانسان كان صديقي ورفيقي القريب في يوم من الايام افرح وابتسم واعرف ان الله يحبني اللي رزقني بأخ مثله,والله يعوض عليه شبابه في الجنه انشالله، واذا كنتم تقدرون تناظرون في عيون ربعكم اليوم وتسمعون حسهم في هالدنيا, احمدوا ربكم على هالنعمه وحطوهم على راسكم دوم خاصة الناس اللي يستاهلون صدق, واعرفوا انكم محظوظين لان غيركم ما يملك ولا بعض اللي عندكم, اما بالنسبه لي مابعد خالد احد والله يجمعني فيه بالجنه انشالله...
انا عرضت قصتي على الناس عشان تاخذ منها عبره, وفاته شي مقدر ومكتوب لكني ابتعدت عنه في اخر شهر له في حياته, بسبب تافه جدا,متخيلين قمة القهر والألم؟!! هو غلط رحمة الله عليه وانا عاندت لكن اللي صار بيننا ما كان يستاهل اللي سوينا, وهذا اللي دايم يسوونه الناس يخسرون احبابهم وربعهم باسباب تافهه, يتركون الشيطان يلعب في عقولهم لين تكبر السالفه ويفترقون , ولو سألهم احد عن السبب يلقون ان ما عندهم اجابه واضحه وهم ما يدرون ان الاشخاص اللي يحبونهم يمكن يروحون فجأة، ياناس انا استنيت لين صار صديقي ذكرى تبون تستنون مثلي؟؟!!...
فالنهايه اطلب من كل واحد يقرى قصتي يدعي لخالد بالرحمه ويدعي لي ان الله يمسح الحزن اللي عايش فيني كل هالسنين ونصيحه من قلب ذاق مراره الفراق"الانسان اللي تحبه وتغليه رح اليوم وقله هالكلام خله يدري لا تستنى يمكن ما تلتقيه بعدين الا مثل مالاقيت خالد, وشي ثاني مهم لا تنتظر انك تفقد انسان غالي عشان تعرف قيمته وقدره عندك"
ختاما...
الى الفقيد الغالي , الانسان اللي علمني كيف احب الناس والحياه, الانسان اللي نسى سعادته عشان يسعد غيره,صاحب القلب الكبير المليان بحب الخير لكل الناس,اللي تعلمت منه الكثير وافادني في حياتي ولازلت استفيد,الانسان اللي كان غير الناس اللي قابلتهم في حياتي واعرف انه زي ما كان اول صديق بيكون اخرصديق لان ما في مثله في هالدنيا احد...
"صديقي الوحيد" خالد العبدالعزيز الله العالم بحالتي بعدك يالغالي ياليتك هنا عندي، ما راح انساك يا رفيقي هو في احد يقدر ينسى مثلك؟! ليتك قبل ما رحت علمتني وين القى انسان زيك!! متأكد انك تدري اني دايم شاري ما ابيع وتقبل اسفي البالغ على كل اللي صار مني ...الوداع...
قبل لا انهي القصه اذا كنت تقرى قصتي وكان بينك وبين من تحبه مشكله وكنتوا بعاد عن بعض ارسله قصتي وارفقها بأعتذار بسيط دام عندك فرصه الحين..


**واخالداه**3
واخــالداه وضج الجــرح في كبدي
فسرت بالـجرح.. لا انوي على احد
يبكون مــنك_وقد ناحوا_على ولــد
اما انا فبــكائي حرقة ((الرمــــت))
******
يطوف وجــهك في روحي فأســأله
"بالــله!قل لي اهذي فرقة الابــــد؟"
واخــــالده! يغص الشـــعر من الــم
كما تذوب عيون الشوق من ســـــهد
******
ويخطر الموت فوق البيد عاصــفة"
من الدموع...فنادوا الصبر ايا اهلي
غبت في الامس..عل الامس يسعفني
اذا افقت ولم ابـصرك صبح غـد
******
فلحت لي وجدار الــموت منتـــصب
حتى لأوشــك شوقا ان امــد يــدي!!
اين بســـمتك الحسناء؟هل ســــقطت
شمس النهار على ليل من الكمــــــد؟
******
واخــالداه!وعاد الناس..وانصـــرفوا
وانت في القبر..لم تبرح..ولم تـــــعد
تبـــارك اللـه ! نجري كلنا زمـــرا
نحو المنون ولا يبقى سوى الصـــمد
******
تــــــــمــــــت

رد مع اقتباس
قديم 09-30-2010, 08:32 PM   رقم المشاركة : 4
ابو فارس
 
الصورة الرمزية ابو فارس





ابو فارس غير متواجد حالياً

ابو فارس سيصبح متميزا في وقت قريب


افتراضي

مصير الحي يتلاقى (بعد التعديل من قبل الكاتب للجزء الأول )

كاتب القصة:كبرياء الألـــــم..
تنويه: أحب أقول إني بريئ من كل من ضيع أمور دينه وخاصة الصلاة ووقته علشان يقرأ هالقصة......
::::::::::::::::::::::::::::
حاولت إنها تنام تقلبت وماجاها النوم ثم جلست على السرير وضمت المخدة وحطت راسها عليها
...وعادت شريط حياتها...فكرت في حالها...وتذكرت أيامها.. وتمكن منها اليــأس ثم رمت بنفسها على السرير وبــكــت ...
*،،،بعدها تذكرت أن لها ربآ كريمآ يستجيب دعوة المضطر،،،*
فقامت من السرير وكلها أمل ويقين وإيمان بربها وقدرت تتغلب على دموعها ويأسها،،،،
..قالت في داخلها: هالدنيا والله ماتسوى إني أكدر خاطري عليها ،،، وعلى أحزان فاتت ،،، وهموم إن شاء الله إنها ماتدوم.."
بعدين ألقت نظرة لتركي اللي نايم ومو حاس فيها ، ناظرت الساعة صار باقي على الفجر شوي...
وراحت تتوضى وصلت..ورفعت أكف الضراعة..ودعت ربها الكريم الرزاق..
،،*،،(اللهم أنت ربي لا إله إلا أنت الواحد الأحد الفرد الصمد الذي لم يتخذ صاحبة ولا ولد..سبحانك أنت الرحمن الرحيم الكريم الرزاق المعطي المنان.....سبحانك من لي سواك أدعوه وأرجوه وأستعين به اللهم إنك تعلم حالي وأنت العليم الخبير... اللهم لا تذرني فردآ وأنت خير الوارثين...)،،*،،
دعت ربها وذاقت حلاوة المناجاة والخضوع والإنكسار بين يدي رب البريات....
،*،حست هيلة بالراااحة والطمأنينة....
وأذن الفجر وصلت،،
صحت زوجها للصلاة..عقب أخلدت للنوم ولسان حالها يقول:
~ لولا الأمل مابقى بالدنيا رجاوي،،،
~ لولا الأمل محدن بهالدنيا سلى،،،
****************************
َََََََََََََََََََََالجزء:الأول

صحت على صوت الساعة 11 صباحآ اتصلت في زوجها..
تركي:"الــــــو"
هيلة بصوت مبحوح:"السلام عليكم"
تركي وهو مستغرب من صوتها:"أهلــين وعليكم السلام اش هالصوت للحين نايمة؟!!"
هيلة:"لا توني صاحية من النوم..إلا بسألك؟"
تركي:"هلا.. "
هيلة:"اليوم كالعادة بتتأخر في العمل؟"
تركي وهو يتبسم:"إحتمال.. ليه مشتاقتلي"
هيلة:"هههه لا مو مشتاقة..."
تركي وهو يقاطعها:"أفـــــااا ماشتقتي لي بصراحة ما توقعتها منك ..
تركي بنبرة زعل:"أجل ليه متصلة اشتبين؟.!"..
هيلة:".. بس حبيت أسألك وش بغيت على الغدا اليوم؟"
تركي:"أطبخي أي شي.. ماتفرق معي.. عادي.."
هيلة وهي تقلده:"ما تفرق معي عادي.. قل كلمة حلوة..."
تركي وهو يضحك:"كلمة حلوة."
هيلة تتنهد وبضيقة:"أقول ياللا مع السلامة"
تركي:"ياالله ماينمزح معها ذي..خلاص حبيبتي أي شي منك حلو"
هيلة:"تسلم قلبي بس ماتبي شي معين اطبخه لك"
تركي:" قلت لك كل شي منــــك حلو ومعليش ما أقدر أطول معاك أنا مشغول ياللا مع السلامة"
هيلة:"مع السلامة"
هيلة من الشرقية حلوة ومملوحة واللي يميزها جــــاذبيتها ... متزوجة تركي وهو من الرياض
&&&&&&&&&&&&&&&&&&&&&&&&&
شافته أمه وهو داخل البيت يدور يدخل غرفه ويطلع منها ويدخل للثانيه مايدري وين يروح تحسرت أمه لما شافته
ودعت له ودمعتها على خدها:"إنا لله وإنا إليه راجعون..لا حول ولا قوة إلا بالله..الله يهديك ويفتح عليك ويعصمك..اللهم آمين"

دخل سلمان على زوجته وهو فاقد الوعي وريحة الخمر تشع منه.. وشكله من أبشع مايكون.. عيونه حمرا ووجهه مكتم..
يمشي خطوة ويعرج خطوتين.. يضحك ويتكلم مايدري وش انه يقول....
سارة خافت من شكله وهيئته،المفروض يكون عندها مناعة ضد هيئته وماتخاف لأنها مو هاذي أول مره تشوفه بهالحالة والمنظر المقزز....
ابتعدت عنه قرب منها وجرها من شعرها وضربها ضربها ودفعها وطاحت ،، تألمت كثيـــــــــر،،
رمى عليها ورقه .. ومشى ودار في الغرفة خبط في الكرسي جلس وانسدح عليه..
سلمان يشهق بين كلامة وبلهجة غير مفهومة قال:"يقولون مـ^ـا عاد نبي نشوفك مرة ثانية...^..مدري وش في ذا العـ^ـالم علي!!.." ،،،
ثم نزل راسه على كتفه وغمض عيونه ونام ..
سارة وهي تناظر الورقة ناظرت سلمان بنظرات كلها حقد وكره هزت راسها متحسره وحزنت على الأيـــــام اللي قضتها مع سلمان ....
قربت لم الكرسي وهي تزحف وتمسكت فيه لما قدرت توقف ... وحاولت تقاوم ريحته .. عطته كف وهزته علشان ينتبه لها....
بكت وبصرخة ألــــم:"حرام عليك فوق إنك طايش.. صايع ضايع.. بتصير عاطل باطل أصلا أنت ما منك فايده ......
والله حراااااااام ظلمت نفسك وظلمتني معك حسبي الله عليك ضيعتني ودمرت حياتي الله يدمر حياتك.."

نزلت تحت ودخلت الصاله مسكت التلفون وكلمت على عمل أخوها...
-:"الــــو"
ساره:"الــو السلام عليكم"
تركي:"وعليكم السلام ورحمة الله ،آمري"
ساره:"لو سمحت متعب موجود؟"
تركي:"إيه موجود"
ساره:"ممكن أكلمه"
تركي :"لحظة شوي"
تركي وهو يلتفت على متعب:"متعب الأهل يبونك على التلفون"
استغرب متعب نادرآ مايكلمونه:"اللهم اجعله خير"
ساره أنفجرت من الصياح
متعب:"الووو"
ساره:"السلام عليكم ياخوي"
متعب تفاجئ من صوتها المبحوح والمخنوق عرف أنها تبكي:"وعليكم السلام !!..عسى ماشر؟!"
ساره بكلام متقطع:"مت عب الله يخلييي يك أول.. ما تط لع مر علي"
متعب:"سلامتك..تعبانه!..فيك شي؟.."
ساره:"..........."
متعب:"الووو..."
ساره:"لازم اسكر الحين إذا جيت بتعرف كل شي الله يعافيك لا تتأخر"
متعب:"إبشري إن شاء الله بس هدي نفسك شوي..ياللا مع السلامه"
ساره:" مع السلامه"
^^^^^^^^^^^^^^^^^^^^^^^^^^^^^^
بعد ما جهزت الأكل دخلت غرفتها واحتـــارت وش تلبس لتركي ؟! تذكرت إنه يحب هاللبس عليها ثم دخلت الحمام تاخذ شور
بعد ماطلعت لقت تركي في الغرفة ناااايم جت تصحيه وفي داخلها:"اشوى ماتأخر كثير"
هيلة وهي تقرب منه بحنية:"تركي..تركي.. "
تركي وهو يفتح عيونه :".. هلا عمري"
هيلة:"الغداء جاهز"
تركي:"طيب طيب"
وينقلب على الجهه الثانية ويحط المخدة على راسه ووجهه،
هيلة:"تركــــــي حبيبي ياللا قوم! أشلون تقول طيب طيب وأنت تعدل نومتك ؟!"
تركي:"خليه عقب صلاة العصر"
هيلة وهي تترجاه:"لـا معليييش حبيب عمري الأكل لما يبرد مايصير له طعم حلووو"
وتبعد المخده عنه،
تركي يحاول أنه يمسك أعصابه على شان ما يغلط عليها :"هيييله رجاءآ خليني أنام تراني تعبااان قلت لك عقب العصر"
ويسحب اللحاف ويغطي وجهه،
هيلة:"بسم الله عليك من التعب إن شاء الله في عدوينك"
تركي:"ياللا عاد حبيبتي من غير مطروووط أطلعي وسكري الباب خليني أنام"
هيلة بإصرار:"والله ما اطلع إلا بك ..تغدى وصل العصر ونم براحتك وماابزعجك"
تركي وهو متضايق:" هي عادة أني أنوم العصر"
ثم قام وابتسم لها:"وش عاد يفكني منك لما تحطين شي في راسك...
منتي مخليتني أنام زين ، أقوم وأمري لله"
هيلة في داخلها تضحك:"ماينفع معك إلا كذا هههه وحاولت تكتم ضحكتها"
سبقها غسل وجلسوا على سفرة الأكل...
تركي وهو يبتسم:"اللـــــه وش هالأكل الزين ...
وهو يتنهد: بس لو إنك حاطته العصر كان زادت حلاته "
هيلة ناظرته بنص عين،
تركي وهو يضحك:"عمومآ مشكورة حبيبتي ماقصرتي تسلم إيدينك"
هيلة:"............"
ساكته وتاكل على أقل من مهلها ،أنتبه لها تركي،
تركي:"هيلة:"
هيلة وهي ترفع عيونها:"............."ناظرته (يعني نعم) وماتكلمت بس تناظر فيه،
تركي حس أن فيها شي .. خصوصآ أنها مو من عادتها تكون ساكته على طول ..وقرأ في عيونها كلام لكنه عجز يترجمه أو حتى يفهمه..
تركي حب إنه يقطع هالصمت وفي داخلة يقول:"على شان تحكي بستفزها"
تركي:"حشى..حشى..وش أنك طابخه.. ليه هذا كله ترانا اثنين أنتي طابخه لعزيمه؟!.. وبعدين اشلون أمداك تطبخين كل هالأصناف؟!...وإلا خفينابك وقلنا كل شي منك حلو ..كبر راسك وحطيتي حيلك فالطبخ.."
هيلة أنقهرت وابتسمت إبتسامة جـــااافة:"أعجبك وبعدين الله معطيني بركة الوقت..إلا ليش متضايق ماعهدت البخل عليك ولا تخاف حبيبي بينوكل"
تركي:".........."
حس إنها هزأته
،
هيلة:"بغيت أتكلم معاك بموضوع"
تركي" آمري حبيبتي..."
هيله:"تركي أنااا..."
تركي:"........."
هيلة حست أنها أستعجلت وما ودها تتكلم:"......."
تركي:"كملي أنتي وشو؟!"
هيلة أبتسمت:"ااا..اممم......."
تركي:"ياالله عليك تكلمي"
هيلة:"وإلا أقولك أتكلم بوقت ثاني"
تركي أرتفع ضغطه بس مابين لها،
تركي:"على راحتك بس إذا بتتكلمين تراني متفرغ لك ذهنيآ..وعقليآ..ونفسيآ..وفكريآ.."
~~~~~~~~~~~~~~~~~~~~~~~~~~
وعلى طول بعد ماسكر منها أستأذن من عمله وطلع لها..
وهي دخلت غرفتها وجمعت أغراضها.. وناظرت سلمان اللي نايم لا صلاة ولا عبادة..تحسرت على حالها ودمعت عيونها:"الله يعين نفسك عليك،إنا لله وإنا إليه راجعون"
طلعت برى في سيب البيت تنتظر أخوها متعب..
ألحقتها أم سلمان ولمحت عليها آثار التعب:"ساره أنتي بتطلعين؟!"
ساره:"هلا خالتي" وحبت راسها,,(خالتها أم زوجها ).
وهلت دموعها..،
أم سلمان في داخلها :"لا حول ولا قوة إلا بالله "
وماقدرت تناظرها وتقطع قلبها على ملامح سارة...
ساره:"خالتي أنا ماشيه ألحين لبيت أهلي وو..ويمكن ماأرجع ثانيه"
أم سلمان بأستغراب:"منتي راجعه؟!!!.."
ساره هزت راسها(يعني لا..):"خالتي أنا مالي قعده في هالبيت"
أم سلمان:"ليه؟!.."
ساره نزلت راسها:"ياليت تعذريني وما أتكلم في السبب.. والسبب هو سلمان ولدك وإنتي أخبر فيه"
أم سلمان:"عاذرتك يابنتي هو ولدي والله يصلحه ويهديه بس أصبري عليه وأحتسبي والله بيعوضك خير وتذكري إن مع العسر يسرين والصبر مفتاح الفرج..."دمعت عيون أم سلمان،
ساره:"..........."
أم سلمان وهي تكمل كلامها :"فكري زين ولا تتسرعين في قرار تندمين عليه..ولاتنسين إن فيه بينكم ولد جاي بالطريق حرام يعيش مشتت "
ساره بكت وضمتها أم سلمان،،،
أم سلمان:"امنيتي إني أشوفكم أسعد زوجين وأشوف عيال ولدي بين يديكم..."
ساره تقاطع خالتها:"خالتي كفايه ماأقدر أتحمل أسمع أكثر..وأسمحيلي أقولك مستحيييل أعيش معـــــــاه.."
أم سلمان:"لاحول ولاقوة إلا بالله.."
أم سلمان حبت إنها تغير فكرتها عن الطلاق وتستعطفها وتحنن قلبها،،،
أم سلمان:"وأهون عليك تروحين وتتركيني!"
ساره:"خالتي والله ماودي أتكلم فيه بس إعذريني في الكلام اللي بقوله ولا تزعلين علي.. خالتي إذا إنتي أمه وما تحملتيه عاد كيييف أنا وهذي عشرة عمر ياخالتي وبربي ما تهونين علي.. ولو على العيشة معاك كان مافارقت هالبيت لو لحظة جعله عااامر بوجودك..اتمنى إني اطلع وما في خاطرك شي علي.."
أم سلمان عاذرتها وماحقدت عليها في كل اللي قالته عن ولدها...
سمعوا صوت الجرس..
سارة حبت راس أم سلمان :"خالتي هذا أكيد متعب..ياللا في أمان الله "
فتحت الباب وطلعت لأخوها أغراضها..
أم سلمان تتابع خطوات سارة ومشيتها وهي تتطلع تذكرت أيامها اللي عاشتها معها وفي داخلها:الله يحفظك ويوفقك..
وتذكرت ولدها وتعامله مع سارة..
تنهدت:" والله ما ألومك.. الله يعينك على بلواك.."
سارة طلعت ودخلت مرة ثانية شي في خاطرها ودها تقوله لخالتها،
سارة قربت لم خالتها وحبت راسها:"خالتي سامحيني وحلليني عن كل غلط غلطته في حقك أو قصرت معك..ولا تزعلين علي..ولا يصير شي في خاطرك علي،،، والواحد ياخالتي مايدري متى يومه.. سامحيني ياخالتي"
أم سلمان:" الله يطول بعمرك إن شاء الله..يابنتي مامنك قصور أو غلط والله يبيحك ويحللك وتأكدي إني ماشلت في قلبي عليك شي ..
وبنبرة حزة قالت:"إلاأنتي ياسارة حللينا وسامحينا وإنسي العذاب والأيام السود اللي عشتيهم مع ولدي...."
أم سلمان:" سارة "
سارة:"سمي"
أم سلمان بصوت مخنوق:"لاا ااا تدعين عليه أنا ماأقولك أدعيله ياما ذقتي منه المر بس أقول لاتدعين عليه...
وتذكري كل ماجيتي بتدعين عليه خالتك اللي مالها بهالدنيا غير ربها ثم ولدها وأنا أم وبحاجة ولدي.."
سارة:"قولي آمين ياخالتي الله يهديه ويصلحه..ويسخره لك ويحنن قليبه عليك ويجعله قرة عينك وتشوفين بره فيك ..
الله يخليلك إياه وجعل قلبك مايحتر عليه...هذا حقك علي ياخالتي...
والله يسامح ولدك ويحلله ويبيحه.."
أم سلمان:"اللهم آآآمين الله يجزاك خير ياسارة والله هذا من طيب أصلك"
سارة:"ياللا خالتي تآمريني على شي قبل لا أطلع"
أم سلمان:"سلامتك ياسارة روحي لاتتأخرين عليه ،الله يوفقك ويبارك فيك ويكملك بعقلك وجعلك في كل خطوة تخطينها سلامة..."
سارة كبرت أكثر في عين خالتها أم سلمان وصارت كل يوم تدعي لها من كل قلبها......
:::::::::::::::::::::::::::
وفي السيارة:
متعب قلبه مقبوض على أخته ويتساءل في داخله:"يالله وش صاير لها؟!..صوتها مو طبيعي!..أكيد فيها شي كااايد ..وإلا كان ماإتصلت علي..... "
ولما وصل لها أستغرب من كثرة الأغراض ركب هالأغراض وجلس ينتظرها في السيارة..
وكانت تكلم خالتها (تستسمح منها)
طلعت له ساره وهي في قمة تعبها وألمها...حس بتعبها أخوها لما شاف طريقة مشيتها وكيف أنها تتمسك في باب السيارة تحاول تركب..
متعب نزل من السيارة وساعدها مسك يدها وركبها..
(ولماتكلمت حس بصوتها نبرة حزن وأنين)....
سارة:"الله يجزاك خير.."
متعب:"...وياك"
سارة:"عسى بس ماتأخرت عليك؟"
متعب:"لا ياقلبي ماتأخرتي ..إلا أنا تأخرت؟!"
سارة:"لا الله يعافيك"
متعب:".........."
سارة:".........."
متعب:"سارة ليش جايبه كل هالأغراض معك؟"
سارة:"........."
متعب:"إلا وين سلمان؟ سيارته شفتها عند الباب هو موجود!"
سارة:".........."
سارة وهي تلتفت عليه:"أنا أسفة يااخوي تعبتك وطلعتك من شغلك..وفي الأخير تشوف سيارته موجودة وبتقول ليش ماخلته يجيبها مدام أنه موجود.."
متعب:" سارة ياقلبي أفهميني والله ماكان قصدي كذا ولاحتى جاء على بالي.. أنــا أقصد أن سلمان ماعنده علم إني جاي أخذك صحيح ؟!"
سارة:".........."
سارة ساكتة طول الطريق وتتجاهل سؤال متعب..لكن واضح عليها أنها تبكي..
ومتعب ماحب أنه يضغط عليها خصوصآ لما سألها وماجاوبته وبعد لماعرف أنها تصيح..
@@@@@@@@@@@@@@@@@@@@@@@@
تأخر عليها راح يصلي العصر ومارجع.. هي جهزت الشاهي وجلست تنتظره..فتحت التلفزيون وشافت برنامج أطفال..عقب سرحت تفكر وخنقتها العبرة..تفكر هي تكلم تركي في اللي يدور في بالها وإلا تنسى الموضوع وتصبر...
دخل تركي وهي بعالم ثاني لدرجة أنها مو حاسه بدخلت تركي..
تركي:"السلام عليكم"
هيلة:"......."
تركي:"السلام عليكم"
هيلة:".............."
فجأة تدمع عيونها..
وتركي أستغرب من إنها ماترد عليه السلام وما عطته أي أهمية وفي داخله:"لها كم يوم وهي كذا!"
توقع إنها زعلانه عليه (هو عارف إنها حساسة بزيادة وتزعل بسرعه):"لا ما أتوقع أنها زعلانه هي أكيييد فيها شي ..بس وشو؟!!"
ولمح عيونها غراقنه دموووع..
تركي:"وتبكي بعد!"
تركي بصوت عالي شوي:"هيييلة"
هيلة وإيدها على قلبها:"...بسم الله علي..أنت جيت؟"
ومسح دمعة نزلت غصب عنها لما شافته،
تركي وهو يبتسم لها:"بسم الله عليك روعتك أشوفك انخضيتي!"
هيلة:"لا عادي ياقلبي بس ماكنت عارفه إنك موجود"
تركي بإستغراب:"أنتي وش فيك!أحاكيك وماتردين علي؟"
هيلة:"أعذرني ماسمعتك..ليه انت من متى جاي؟..وش كنت تقول؟!"
تركي:".؟؟؟؟؟!!!!..."
تركي واضح عليه علامات الإستغراب،
هيلة:"......."
تركي:"أنتي فيك شي؟"
هيلة:"لا...مافيني إلا العافيه"
تركي بنص إبتسامة:"!!..علي أنا هالكلام"
هيلة وهي متضااايقة:"يعني اش بيصير فيني؟صدقني مافيني شي..مافيني إلا العافية"
تركي:"هيلة وش هالأسلوب؟! رجاء لا عاد يتكرر سامعه.. عادي قولي مافيني شي من غير ماتعلين صوتك"
هيلة:"تركي أنا آسفة لا تزعل مني سامحني"
تركي:"خلصنا ..المهم وين سعد؟"
هيلة:"مابعد جاء...."
تركي:"يالله قلت بجي بألقاه ياأنه بيطير من الفرح لما يدري وش أني جايب له"
هيلة تحاول تخفي دموعها قدامه،،،
هيلة:"تركي أنت زعلت علي؟"
تركي:"وليه تسألين؟!.."
هيلة:"حبيبي لا تواخذني والله كنت متوترة شوي.."
تركي:".........."
هيلة:"زعلت ؟...."
تركي:".....لا..مازعلت"
هيلة:"الحمدلله طمنت قلبي"
تركي:"ليه يهمك أكون زعلان وإلا راضي ؟!!"
هيلة:"أكيييد يهمني أشوفك راضي علي ومو زعلان"
تركي:"........."
هيلة بإبتسامة:"وبصراحة قبل شوي أكلني قلبي لما حسيت أنك زعلت.."
تركي يقاطعها:"إلا ما سألتيني وش جبت لسعد؟!"
هيلة:"أأأف مايحتاج أسأل..أكيد ألعاب..وبعدين باينه من الكيس "
تركي في داخله:"هاذي وش فيها اليوم!!!"
تركي تركها وقام يتأمل بيتهم عن بعد ويناظر الصالة وكأنه أول مرة يشوفها... طاحت عينه على الكيس تبسم وغرق في بحر الخيال...
وتخيل أن له ولد يلعب بهالألعاب...وتخيل كيف أنه يلعب وياه...
تركي بإبتسامة عااابرة:"اللــــه متى يتحقق حلم عمري وأشوف ولدي..الله متى يجي ويملي علينا زوايا البيت ببرائته ولعبه وضحكته........"
هيلة قطعت عليه حبل أحلامه..وبضيقة:"أبي أفهم شي واحد أنت ليه كذا!.."
تركي:"؟؟؟!!!!"
هيلة:"تركي إلى متى بتسمعني هالكلام..."
وكملت كلامها وهي تطلع من عنده:"والله مو بيدي إني ماجبت لك عيال..أفهم أنه أن هالشي مقدر ومكتوب لنا.."
تركي تضايق منها وطلع من البيت.....
%%%%%%%%%%%%%%%%%%%%%%%%
يعقوب:"يمه متى بنشوف عمتي هيلة..مشتاق لها"
جابر:"إيه والله من زمان عنها يبه خنسافر لها بالرياض"
شريفة بضيق:"مشتاقين لعمتكم عمت عيونها إن شاء الله"
يوسف فتح عيونه مستغرب وناظرها:"وتدعين عليها بعد...الحمدلله إن فيه ملائكة تقول ولك بمثل"
جابر:"يمه ليش تكرهينها عمتي حبوبه..وطيبه..وتحبنا..وتعطينا هدايا كل ماشافتنا.."
يوسف:"بس هذا اللي هامك هداياها"
شريفة:"أنا ماأكرها.."
يعقوب:"أجل ليش تدعين عليها حرام هي ماسوت لك شي"
شريفة:"...آآآآآف متى بتسكت أنت ياه"
يوسف خذها فرصة علشان يكلم زوجته..هو ماوده يكون بين زوجته وبين أخته بغض أو عداوه...
يوسف:"صدق شريفة ليش أنتي كذا ،عطيني مبرر واحد يخليك تتعاملين مع أختي بقسوة وحقد
كنها موته لك غالي ترى حرام اللي تسوينه فيها ماأدري ليه تكرينها!
أختي اش ضرتك فيه سبحان الله هذا وهي بعيده تدعين عليها عاد كيف لو أنها هينا عندنا اش راح تسوين...
وبعصبية"وسمعيني عاد تراني أحذرك لو جتنا هينا عندنا وقليتي أدبك وأحترامك معها مرح يحصلك طيب سمعتي"
#######################################
وصلوا ودخلوا البيت... وكانت هي طول الطريق ماكلها قلبها وخايفة من اللي راح يسويه زوجها لها...
أم متعب خافت على سارة لما شافتها داخله ضمتها لصدرها:"حبيبتي وش فيك؟!"
سارة:"........."ساكته وتصيح،
متعب:"بنتك رايحه فيها تعباااانة بالحيييل..."
وطلع متعب للسيارة ينزل أغراض أخته،،،
سارة بنبرة حزن:"يمـــه ما أبي أعيش مع سلمان.."
((أم متعب ماجاء على بالها إن فيه مشكلة كبيرة تعاني منها سارة..وتوقعت أن بنتها عجزت تتأقلم مع سلمان..أو أن فيه مشكلة بسيطة..
وماكانت تدري عن زوج بنتها بأي شي شين..وسلمان لما يزورهم يتمثل لهم بالنسيب الوفي والزوج الكفوء والرجال اللي يشترى..))
أم متعب:"تحاول تهدي بنتها:"ماعليه يابنتي أصبري ولا تبكين ترى مافيه شي يستاهل دموعك (ولا تنسين الدمعة غــــــااالية) وأنتي توك ماصار لك إلا عشرة شهور.."
سارة:"بس يمه.."
أم متعب:"لا بس ولا غيره وش اللي ماتبين تعيشين معاه!!!
تعوذي من إبليس وماصار إلا الخير..والليلة تراك بترجعين لبيت زوجك"
سارة أنقهرت من رد أمها لها وأنها بترجعها وفي داخلها:"وحتى ما أسألتني ليش أنا ما أبيه؟أو على الأقل تسأل وش فيني تعبانة!معقول أهون عليها تشوفني بهالحالة وعااادي عندها"
سارة:"يمه مو مسألة أني أعصيك بس أنا طلعت من عنده وما أبي أرجع له ثانية"
أم متعب:"لا حول ولا قوة إلا بالله...الله يهدي الأنفس يابنيتي"
سارة:"لو أهتدوا كل الناس ما أهتدى سلمان"
أم متعب:"حبيبتي ما تعلمين الغيب..وأتقي الله الهداية مو بيدك..وقلوب بني آدم بين أصبعين من أصابع الرحمن يقلبهما كيف يشاء"
سارة:".........."
نورة تدخل عليهم:"أهلين سارة غريبة جايتنا هالوقت"
سارة:"........"
قربت منها وسلمت..
نورة:"سلامات أختي وش فيك؟!
أم متعب:"سارة مافيها شي"
نورة:"يمه وش اللي مافيها شي"
نورة وهي تلتفت على سارة:"سارة وهالمرة وش مسوي سلمان بعد..لا تقولين أنه ضاربك حسبي الله عليه الله لا يوفقه"
:::::::نورة تدري عن أختها وكانت سارة دايم تشكي لها وتحرصها أن ماأحد يدري،،،،
سارة:"........"
::::::أم متعب أفهمت من كلام بنتها نورة أن سلمان يضرب بنتها سارة ..وفي نفس الوقت مو مصدقه في رجل بنتها(ماخذه فيه مقلب أنه حبيب وأنه...وأنه...)،
أم متعب وهي متفاجئة:"نورة أنتي وش قاعدة تقولين وضحي كلامك"
نورة وهي تناظر سارة وتذكرت أن سارة محلفتها أنها ماتحكي عنه..:"يمه سلمان اا.."
سارة:"سلمان ماينفع أنه يكون زوج وأنا أبي أتطلق منه.."
أم متعب:"سارة صدق اللي سمعته سلمان يضربك؟ .."
نورة:"يمة يعني أبكذب وأتبلى عليه"
أم متعب:"نورة حبيبتي ياليت تطلعين لغرفتك"
سارة:"أيه يمه صحيح اللي سمعتيه وياليتها وقفت على الضرب وبس"
أم متعب:"ومن غير سبب يضرب؟!
وناظرت بنتها وخافت عليها:"واليوم أكيد ضربك بس لا يكون تأذيتي وتأذى اللي في بطنك؟!!.."
سارة:"يمه أنا تعبــــاااانه وراسي مصدع مقدر أتكلم أبي أنــاااام وإن شاء الله تكون نومة طويييلة ما أصحى منها أبد"
أم متعب:"لا إن شاء الله بسم الله عليك ياسارة لا تقولين كذا وضمتها حبيبتي سارة كل شي إن شاء الله بيتصلح
وسلمان مرح يرفع إيده عليك مره ثانية لكن أنك تفكرين في الطلاق إنسي ياسارة..
ولا تنسين أنك حامل والزعل والضيق مو من صالحك ولا من صالح الجنين الله يهون عليك"
سارة:"يمه أنا رايحه أنام تآآآمريني بشي قبل لا آنام؟!.."
أم متعب:"سلامتك حبيبتي.. بس إنتبهي لنفسك.."
وهي ماشيه لغرفتها حست إن شي ينزل منها دخلت الحمام وأكتشفت إنها سقطت اللي في بطنها وكانت في شهورها الأولى...
بكت وانهارت لكن هالشي فرحها...
على قوة الحزن والقهر اللي في داخلها وقوة الألم والوجع اللي تحسه فيها.. وعلى الضيم والظلم اللي معيشها عليه تركي...
إلا إنها حمدت الله ان اللي رح يربطهم في بعض "العيال" انتهى بمجرد ضربه لها،،،،، .

رد مع اقتباس
قديم 09-30-2010, 08:33 PM   رقم المشاركة : 5
ابو فارس
 
الصورة الرمزية ابو فارس





ابو فارس غير متواجد حالياً

ابو فارس سيصبح متميزا في وقت قريب


افتراضي

مصير الحي يتلاقى - الجزء الثاني....

كاتبة القصة : كبرياء الألم
::::::::::::::::::::::
الجزء الثاني..
تركي متضايق من أسلوب هيلة معه هاليومين..
ويتفادى أنه يكلمها ويجلس معها..(يمكن يبيها تعدل أسلوبها كنوع من الهجر والتأديب..أو يمكن لأنه يحبها ويموت فيها وهوعارف أنه لو تكلم يمكن يغلط عليها أو يزعلها وهو مايقوى على زعلها..أو متضايق ويبي يتحاشاها بالمره..)
وإذا أضطر أنه يكلمها كلمها (ونفسه في خشمة)
تركي:"هيلة"
هيلة:"..لبيه.."
تركي برسامه:"جهزي القهوة والشاهي أبوسعد وأختي بيجونا اليوم المغرب"
هيلة:"إن شاءالله ، الله يحييهم".....
::::::المغرب:
هيلة:"حيا الله أم سعد"
أم سعد(حصة):"الله يحيك ويبقيك"
هيلة:"هذي الساعة المباركة تو ماأنور البيت"
حصة:"الله يبارك فيك منور بأهله"
سعد جايهم يركض:"يمه سامي جاء وبروح معاه نلعب عند خالد"
حصة بضيقة:"إنا لله..لا مافيه روحه"
هيلة:"لا ما عليه خليه يروح ويوسع صدره"
سعد:"يمه تكفين بس هالمره وخالد بيتهم مو بعيد وماراح نتأخر"
حصة:"ياسعد ...."
سعد يقاطعها وهو يتعبر:"يممممه"
حصة:"أقول أسكت"
سامي يدخل عليهم:"هيه أنت ترانا تأخرنا على خلودي بتروح وإلا وشلون؟"
حصة:"منتب سهل ياسامي وتقلده تأخرنا على خلودي...
معليش ولدي مو رايح معاك رح الله يسهل عليك"
سعد وهو يلتفت على سامي:"ســـــاااامي أصبر لي ...ويلتفت على أمه ويتمسك في إيديها :"يمممه الله يخليك..."
حصة وهي تبتسم:"رح الله يهديك بس ياويلك إن تأخرت أذان العشاء تصير هينا"
سعد وهو فرحان:"إن شاء الله يمه"
^^^^^^^^^^^^^^^^^^^^^^^^^^^^^^
وبعد ما صحى من النوم صوت وصارخ ونادى عليها..
سلمان:" ســـــــــــاااارة سااارة سااااارة.."
عقب دخل الحمام ياخذ شور وطلع للغرفة يلبس فتح الدالوب ماشاف ملابسها..عرف أنها راحت لبيت أهلها..
وفي داخله:"طيب يابنت(الكلب..)أنا أوريك شغلك"
دخل على أمه اللي باين عليها التعب والحزن،،
سلمان:"الحيوانة وينها؟"
أمه ساكته:".........."
سلمان:"يمه أحاكيك..وين الزفت سارة"
أمه تناظر فيه..وساكته
سلمان بعصبية:"لا تناظريني كذا وجاوبيني على قد سؤالي سويرة مو موجودة صح بس وين راحت؟!"
أمه:"........"
سلمان:"هي عند أهلها صح؟"
أمه:"ليش تسأل مدامك داري عنها ؟!!"
سلمان:"وأنتي ليش مامنعتيها الزفته تطلع وماتقولي أن ماوريتك فيها ماأكون سلمان"
أمه:"وش بقى تشوف المسكينة منك.!!.."
سلمان مثل كل عادته يتلفظ ألفاظ قبيحة ويلعن في سارة ويسب فيها ويدعي عليها ويتوعدها بالويل منه...
خذا التلفون وأتصل..
سلمان:"ألو.."
أم متعب:"ألو نعم.."
سلمان:"هلا خالتي السلام عليكم"
أم متعب:"وعليكم السلام .... سلمان؟!"
سلمان:"إيه سلمان وش أخبارك خالتي بشرينا عنك"
أم متعب:"الحمد لله أبشرك أنا بخير بس سارة تعبانة ماأدري وش فيها"
سلمان خاف لما جابت طاري سارة بس تطمن لما قالت له أم متعب ماأدري وش فيها"
سلمان مسوي نفسه مايدري عنها..وبستغراب:"تعبااانة؟!! خالتي الله يعطيك العافيه أبي أكلمها شوي"
أم متعب بين المصدقة والمكذبة:"زين لحظة شوي أناديها لك"
أم سلمان تلتفت على ولدها:"يازين الأخلاق..."
وراحت أم متعب تناديها له ورفضت سارة تكلمه لكن أمها غصبتها..
سارة:"نعم.."
سلمان:"نعامة ترفسك إن شاء الله"
سارة:"هه هه خير وش تبي؟ وفي داخلها:الله يفكني من شرك وأذاك"
سلمان:"أنتي يا(الكلبه..) كيف تطلعين وما تقولين لي؟!"
سارة بكل برود وسخرية:"والله أعتقد أنه مافيه داعي ومايحتاج أبلغك أني طلعت..أو بطلع للمكان الفلاني..والوقت العلاني..لأني خلاص ماراح أكون في ذمتك بعد كذا.."
سلمان بسخريه:"ههههه ليش صارت العصمة في يد الحرمة"
سارة:"......."
سلمان وهو يهدد:"أسمعي عاد لو ما رجعتي للبيت مثل ما طلعتي منه والله أن تشوفين شي مني ما يسرك وهذاني أحذرك.."
سارة:"ليه وهو باقي يجي منك شي أكثر من اللي جاني ..بطلقني مثلا..أصلا هذا اللي أنا أبيه..ورجعه للبيت ماني راااجعه..وأعلى مافي خيلك أركبه.."
وتسكر السماعة في وجهه..
@@@@@@@@@@@@@@@@@@@@@@@@
وفي بيت منيرة أخت هيلة ...
منيرة:"سلامات هيلة؟!
هيلة ساكته وتحاول تخفي عبرتها:".............."
منيرة:"حبيبتي اشفيك؟ من جيتي وأنتي ساكته .. وشكلك مو عاجبني بالمرة ذبـــــــلانة ونحفانة وجهك أصفر... "
هيلة تتنهد وتتأوهـ"
منيرة:"بسم الله عليك من الآه"
هيلة تدمع عيونها وينبح صوتها:"والله مدري اش أقولك..."
منيرة:"تكلمي باللي في خاطرك..ولا يردك إلا لسانك"
هيلة:"أنا محتارة بس بقولك وشوري علي.."
منيرة:"آآآمري"
وكانت منيرة طول ماتتكلم أختها ساكته تسمع لها،،
هيلة:"أنا صار لي متزوجة أكثر من 11 سنه وماجبت عيال..
وهالشي أنتي عارفته...
وتتنهد: بس بصراحة صار لي مدة أفكر أني أخلي تركي يتزوج.. وهالشي هو اللي متعبي ومو مخليني أنـــام ...
صحيح أن تركي في حياته ماحسسني بشي أبد..
إلا أني أحيانا أتضايق من بعض تصرفاته وكلامه مع إنه مايوجه هالكلام لي شخصينا بس ولو وأنا تعبت من كثر التفكير ..
عاد وش رايك أحاكيه"
منيرة:"معليش مع أحتراماتي لك منتيب صاحيه اشلون يطري على بالك هالتفكير..لا تقولين له ولا حتى تلمحين له..
تبين تفتحين على نفسك أبواب مسكرة وتركي الله يجزاه خير ويخليه لك عمره ماحسسك بشي وحتى لو تكلم وجرح فيك.. ماتفكرين هالتفكير وإلا نسيتي أنك الحمدلله سليمة،بس ما الله آراد لك العيال أنتي أصبري ولا تيأسين صحيح مر عليكم 11 سنه بس أنتي توك عمرك 26 والعمر قدامك..
هيلة تقاطعها:"28 س.ن.هـ...مو 26 سنه"
منيرة:"الحين اللي بيسمع كلامك يقول الأخت تعدت الخمسين سنه..الحمدلله على كل حال بس مثل ماقلتلك أصبري وأعملي بالأسباب وتعالجي ولا يضيق صدرك وما تضيق إلا عند الله الفرج صلي وأدعي اللي عنا غني وأقري..والصلاة ياأختي تحل أعظم مشكلة بالسموات والأرض(الخسوف والكسوف) وماتبينها تحل مشكلتك اللي ماتوازي شي عند إنقلاب الكون..."
ثم دعت لها..،الله يطعمك ولا يقطعك من الذرية الصالحة قولي آمين"
هيلة:"آمييين الله يجزاك خير.."
منيرة:"......................."
هيلة:"أعذريني كدرت عليك..بس والله كنت ابنجن من التفكير"
منيرة:"بتكدرين علي إذا خليت للشيطان منفذ يدخل ويوديك يمين وشمال..وأسمعي إذا صار ماصار وتزوج عليك زوجك لا تلومين إلانفسك وأنتي السبب.."
هيلة: لا إن شاء الله"
منيرة:"والله أحاكيك جد إنسي هالتفكير..."
****************************
أم متعب تحاول تقنع بنتها:يا بنتي شيلي فكرة الطلاق هذي من راسك
والحرمة ما لها إلا بيت رجلها وأرضي باللي الله كاتبه لكـ..
وبعدين سلمان رجال طيب فيه الخير..رجال ونعم...ومن ناحية الضرب مرح يمد إيده عليك.."
سارة:"يمه مليـــــت والله مليت من قوله رجال ونعم..رجال ونعمـ،
أم متعب:"؟؟!!..." تسمع لبنتها ومنصدمه من اللي تسمع ومو مصدقه...
سارة وهي تبكي:"يمه أي رجال اللي تبيني أرجع له ووالله ما ألوومك عرف يخدعكم ... يمه لا يغرك شكله وهيئه وتعامله معي لما يجيبني عندكم...
أنـــــا غلطت غلطة عمري يوم وافقت عليه وتزوجته ما كنت متخيله أن الدخان يجر لأشياء أكبر وأعظم..
وهالغلطة ما تتصلح إلى لما أتطلق منه ,,,
يمه ما أبي أرجع له ثم يطيح الفاس بالراس والحمد لله أن اللي راح يربطني فيه مــــااات وأنتهى...
أم متعب بإستغراب:"مات وأنتهى؟؟؟وش تقصدين؟!"
سارة:"يمه أنااا طرحت اللي في بطني..."
أم متعب:"وشلـــــــــــــون؟! لـــــاـ .. مستحيييل"
سارة:"والله هذا اللي صار والحمد لله على كل حال..."
أم متعب:"ومتى؟!.. وكيف؟!"
سارة تقول لأمها إن اللي صار لها من زوجها من وقت ما ضربها إلما جت عندهم وأنه هو السبب...
أم متعب:"حسبي الله عليه..."
سارة:"يمه لا تدعين عليه.."
أم متعب:"وبعد كل اللي سواه فيك وماتبيني أدعي عليه!.."
سارة ساكته وتنزل راسها:"........"
أم متعب:"تحبينه؟!!.."
سارة وهي ترفع راسها وبنبرة ألم:"إيه ... وما أنكر محبتي له..بس وربي هالمحبة تمنع حياتي من أنها تستمر معاه..
يمه يعز علي أني أتكلم فيه وفي عيوبه..يمه أنا ما جيت عندكم إلا على شان أعتق حياتي من أسر العيشه معاه..
ساره وهي تتسآآآءل وبصوت مبحوح:"يمه بترجعيني له!.
أم متعب:"..........."
يمه صحيح أحبه بس ما أقدر أستمر مع إنسان مااايعرف ولا يدل طريق المسجد..والله من تزوجته ماعمري شفته رايح للمسجد....
أم متعب اندهشت وقاطعت بنتها:"أعوذ بالله خلاص ماأبي أسمع عنه أكثر.."
سارة:"يمه وكل اللي يسويه فيني يهون والله يهون عند أنه ما يصلي..ودايــم فاقد عقله..
يمه يطلع ويدخل ويغيب عن البيت أيام ولا أدري وين يروح ويــــاااويلي إن سألته وين كنت؟..
هذا غير الضرب اللي يصبحني ويمسيني عليه..ويهون ضربه عند لسانه اللي متبري منه..
يمه الكل متأذي منه حتى أمه ما أسلمت من شره..
إنسان أناني وكريه ومنبوذ..
وحتى الوظيفة أنفصل منها.... وتتذكر كلامه ( ما أدري وش في ذا العالم علي )
يمه أعتقد مايحتاج أكمل وأتكلم عنه أكثر..
وبعد كل اللي سمعتيه يـــا يمة تبيني أشيل حتفي على كتفي وأرجع له..!!
يمه كيــــف بتأمنيني مع إنسان ما فيه خير لنفسه عــــاد كيف بيكون فيه خير لي ولأهله..
أم متعب:"إنا لله وإنا إليه راجعون..يابعد عمري ياسارة أثرك متحمله كل هذا وساكته طيب ليه؟!"
سارة:"......."
سارة:"يمة أنــــا صابره عليه لأني حبيته ..ومتوقعه إنه بأي لحظة بينردع عن أفعاله.. ويتوب وينصلح حاله....." سارة تقول هالكلام وهي منهارة في الصياح....
أم متعب تتنهد وتبكي معاها:"يالــيت.."وفي داخلها :كلمة ياليت ماتنفع الحين.."
وتضم ساره لصدرها:"لا يضيق صدرك ولا تبكيـــن يا بنتي..واللي مثل سلمان مايستاهل إن الواحد يكدر خاطره ويضيق خلقه على شانه..
بس ما كنت متوقعه أنه نذل وحقيـــر لهدرجه وخلاص رجعه له منتي راجعه...."
أم متعب اتصلت في ولدها على شان يودي سارة للمستشفى لأن اللي في بطنها طاااح...

&&&&&&&&&&&&&&&&&&&&&&&&
هيلة أقتنعت من كلام أختها منيرة وأرتاحت شوي..حست إن أحد شال عنها همها..
بس المشكلة في هيلة أنها ضعيفة عند نظرات زوجها الغير مقصودة..وكلامة بإستمرار عن الأطفال..ومحبته لهم..
دخل تركي وسعد وكان باين على تركي الضيق والهم..
هيلة بإستغراب:"سلامات تركي!"
تركي:".........."
سعد:"خالي مافيه شي بس هو زعلان على أبو خالد..لأنه هاوش خلودي وضربه ضرب يوووجع"
هيلة وهي توجه الكلام لتركي وبأستغراب:"بس!.وهذا اللي مزعلك ومكدر خاطرك؟!"
تركي طيب قلبه .. نسى إنه زعلان عليها وما يكلمها...:"إيه والله أجل يضربه هالضرب..لوإنك شايفته تقطع قلبك عليه..
وسم جلد خلودي بالعقال وخالد ياحياتي بين ايديه لا حي ولا ميت..
أبوخالد كلمة عنيف شويه عليه صدق إنه ما عرف قيمة العيال.."
هيلة:"أنت تبالغ*لا حي ولا ميت* وبعدين هذا أبوه ما ضربه إلا أنه غلطــــــان..
وإذا على الضرب والهواش كل واحد وطريقة تربيته لعياله.."
تركي:"بس حتى ولو...مدري كيف قوى قلبه على هالضرب.."
تنهد تركي"بس صدق من قال:ما يعرف قدر الشي إلا اللي فاقده.."(وهالكلام كبير بالنسبه لهيلة)..
*تركي ما كان منتبه للكلام اللي يقوله*
هيلة تقاطعه وبضيق:"آآآف فتحتها قضية ، عادي أبو يضرب ولده مافيها شي.."
هيلة ماتحملت كلامه وأسلوبه..
وما تحملت أكثر لما شافته مبسوط ويلاعب سعد وكان في قمة وناسته..
هيلة:"تركي..."
تركي:"نعم..."
*وسهى سعد عنهم وكمل لعبه..*
هيلة:"إذا تبي عيال من ماسكك..تزوج وعلى فكرة ترى عــااادي عندي.."
تركي أنشد لها وأنتبه لكلامها وأسلوبها الحاد...
تركي:"أتزوج؟!.."
هيلة هزت راسها يعني إيه:"تزوج.."
تركي:"إنتي اليوم مو طبيعية"
هيلة بضيق:"لا أبشرك أنا بكامل قواي العقلية..وتراني ما أمزح جــــــااادة تزوج"
تركي حب أنه يشوف عنها:"ياللا على إيدينك أخطبي لي.."
هيلة أنصدمت..دق قلبها وفتحت عيونها وناظرته وتلعثمت:"؟!!...."
تركي:"هههههههه أجل تزوج هــااااه"
وحب تركي إنه يلطف الجو ويخفف عنها:"وأنا أقدر أتخلى عن شريكة حياتي وحبيبة قلبي.."
هيلة تقاطعه وتظهر له أنها طبيعية وقد كلامها(تكابر):"أنـــا ماقلت تخلى عني أنـــا قلت تزوج وحده تعيل"
تركي:"يــا بعد عمري وش جاب طاري العيال الحين.."
هيلة:"يعني تبي تقنعني إنك مو شفقان عليهم..
تزوج وفكني ترى طقت كبدي.."
تركي:"بسم الله عليك وش منه؟!"
هيلة وهي طالعه من عنده:"من تلميحاتك وكلامك الجارح.."
تركي بعد ما أفتحت هيلة معاه الموضوع أكثر من مره جلس يفكر ومو مصدق إنها تعرض الزواج عليه..
هو بين نارين..بين محبته لها وبين محبته للعيال...
############################
كلمها مرة ثانية يبي يذلها ويهينها..
يبيها ترجع له هي ومو هو اللي يرجعها على شان يذلها..
طلبت منه الطلاق..هددها وقال لها:"أنسي أني طلقك..ولا تعتقدين بكلامي إني أحبك وما أقدر استغني عنك..
بس أسمعي عاد إن ما رجعتي للبيت تراك بتكونين معلقة منتي مطلقة" وسكر السماعة في وجهها....
سارة راحت لأخوها شكت له حالها وبلغته تهديدات سلمان لها...
أخوها متعب خفف عنها وصبرها..:"بتطلقين منه وبينكم شرع الله.."
اتصل في شيخ وسأله..
_:"ألوو..."
متعب:"ألو السلام عليكم"
_:"وعليكم السلام ورحمة الله وبركاته"
متعب:"الله يجزاك خير الوقت مناسب للفتوى.."
_:"نعم مناسب..تفضل بالسؤال"
متعب:"...لي أخت تبي الطلاق من زوجها ومو راضي يطلقها وصار لها مده عندنا وقال لها:راح تكونين معلقة مو مطلقة..!
فكيف تتطلق منه؟!..(وهو مو أهل للزواج) وعرض عليه حال سلمان "
_:"عرج الشيخ بكلام عن الطلاق..وأنه أبغض الحلال عند الله..
ثم سأل الشيخ:"وهل زوج أختك يصلي؟ .."
متعب:"بصراحة لا يصلي .."
_:"أعوذ بالله .. إذن هذا كافر مادام أنه لا يصلي وأختك مسلمة يجب أن يفرق بينهم .. والقاضي في المحكمة يحكم بذلك ..."
متعب:"جزاك الله خير ياشيخ .."
_:"لكن أقول لو تكلمونة وتناصحونه .. عل الله أن يهديه ويفتح على قلبه ... "
متعب:"............."
_:"أسأل الله أن يفرج الهم .. في آمـــان الله"
متعب:"فمان الله"
^^^^^^^^^^^^^^^^^^^^^^^^^^^^^^
تكلمها بالتلفون وهي مستعجلة....
_:"ألو السلام عليكم.."
هيلة:"أهلين وعليكم السلام"
منيرة:"هلا قلبي ..أسمعي ما أبي أطول معاك أنا مشغولة.."
هيلة تقاطعها وهي تضحك:"هههه ويوم إنك مشغولة ليه متصله..
(وكأنها تذكرت شي) إيــــه وإلا ما تصبرين عني وحبيتي تسمعين صوتي وتطمنين علي.. الله يسلمك أنا بخير.."
منيرة وهي تضحك:"هههه والله إنك واثقة بعد..
أقول أستأذني من تركي تراني بأمرك كل يوم عصر زين وخبريني ياللا مع السلامة"
هيلة بإستغراب:"لحظة... لحظة تمريني؟! وكل عـصـر! وين نروح؟!"
منيرة:"شوي شوي علي كلتيني .. كم سؤال سألتيني؟!.. المهم ما عليك بتعرفين بعدين .."
هيلة:"من حقي أسأل .. تخبرين هالأيـــام الدنيا ما منها آمان "
منيرة وصوتها تغير:" .... أجل ما منها آمان .. ؟!! "
هيلة:"لا يكون زعلتي أمزح معاك .. "
منيرة:" هه هه لا حياتي مازعلت .."
هيلة:"ههههه أدري فيك ماتقوين على زعلي ..."
منيرة:"ياربي على هالثقة اللي ذااابحتك !! "
هيلة:"ههههه ... منيرة إذا سألني وين بتروحين؟! وش أرد له"
منيرة:"يا الله عليك تصرفي ... "
هيلة:"مانيييب مسكرتها إلا لما أعرف وين بنروح العصر"
منيرة:"فيه طبيبة شعبية بنروح لها إن شاء الله..أرتحتي الحين"
هيلة:"الله يكتب اللي فيه الخير.زين ياللا مع السلامه"
منيرة:"مع السلامة"
$$$$$$$$$$$$$$$$$$$$
تمت إجراءات الخلع في المحكمة...
سارة وهي طالعه من المحكة فرحــاااانة بس هالفرح ممزوج بحزن..
لأنها تتطلقت في مدة بسيطة والمجتمع ويحملها الذنب والخطأ..والناس ما لها إلا الظاهر..
وفي داخلها تتألم..وتخاطب نفسها بحسرة:"صحيح أني بأفتقد اللي كان أحب وأعز إنسان"سلمان" بالنسبه لي,
بس المحبة بدون وفاء تنتهي..والأمان يتبدد مع الخوف..
وتتنهد:"عمري ما حسيت بأمااان معاه.."
مر طيف أم سلمان في خيالها:وصحيح إني بخسر الوحيدة اللي كانت هي محسستني بالأمان في ذاك البيت..
وتصفحت ذكرياتها..وتذكرت خالتها وكيف أن أم سلمان تصبرها..وتوقف معاها في وجه ولدها..بالرغم من اللي أمه تشوفه منه والعذاب اللي معيشها عليه..
ودعت لها"جعل ذاك الوجه ما يعرض على النار"
بكت بحرقة:"وصحيح إني صرت الحين مطلقة..
ضحكت تسلي نفسها وهزت راسها:"الحمد لله على كل حال..
تذكرت سلمان وطريقة تعامله معاها...
وفي داخلها:"أحساسي بالغربة والإهانة معاه..وإحساسي بالخوف وإنعدام الأمان..والله هم الدافع لطلاقي منه..."
(سارة فضلت إنها تبيع كل شي علشان تشتري حريتها وأمااانها..اللي أفتقدهم مع سلمان..
ولأن حرية الإنسان وأمانه ما يعادلها أي ثـمـن وما يوازيها أي تـضـحـيـة..)
ولما رجعت سارة من المحكمة ووصلت للبيت أنهااارت وبكت دم مو دموع..
متعب:"خلاص كافي صياح..وأحمدي ربك إنها جت على كذا..
وخلصتي حياتك من اللي أسمه سلمان هذا الله لا يعيده..
المفروض إنك تفرحين مو تصيحين وتزعلين نفسك وتكدرين خاطرك"
سارة:"......."
متعب:"وين راحت قوتك؟! (ويذكرها بكلامها) أنا ما أبيه طلقوني منه.."
سارة:"هاذي مو قوه وإن كانت قوة ، قوة بالكلام بس..
والله إن داخلي مهزوم ماني مستوعبه إني خلاص صرت مطلقه.. عارف وش معنى مطلقة؟!.. أنا بنت..لي مشاعري وأحاسيسي..
فكيف بتكون نظرة الناس لي..."
ومتعب يحاول يهديها....
%%%%%%%%%%%%%%%%%%%%%%%
شاورت تركي وما رفض..ولا حتى فكر أنه يسألها ليه كل يوم؟! وعلى وين بتروحون؟..
أصلا باله منشغل..يفكر يتزوج وإلا لا..
لكن رسى تفكيره وأتخذ قراره إنه يعيش حياته ويتزوج..
بس أنه مو عارف كيف يصارح زوجته..
وصارت هيلة كل يوم تتعالج بالقران الأعشاب والأدوية الطبية..
&&&&&&&&&&&&&&&&&&&&&&
*تركي عايش صراع داخلي ومتذبذ رايه هو يتزوج وإلا يصبر..خصوصا لما عرف أنها كل يوم تروح تقرأ وتتعالج..
لكن حلمه بالعيال مسيطر عليه...
*هيلة ما فقدت الأمل وأملها بالله كبير هو سبحانه مسبب الأسباب..
توكلت على ربها وابذلت الأسباب:(الصلاة..الدعاء..الرقية الشرعية..الصدقة..الأدوية والأعشاب وغيرها....)
*سارة عاشت حياتها طبيعية في فترة عدتها..
وحاولت تتجاهل أسئلة الناس ولا تهتم باللي ينقال عنها..
ومرت أيام العدة عليها طويــلة وثقيلة لكنها صبرت وتحملت وقدرت إنها تتغلب على همومها وتتناسى..
*أم سلمان حست بفراغ كبير في حياتها من بعد سارة..
وأفتقدت اللي كانت مسليتها في البيت ومعاها في كل شي ومعتبرتها بنتها..وشايلة شوي من عبء ولدها عنها...
:::::::::::::::::::::::::::::::::::::::::::::::::: :::::::::::

رد مع اقتباس
قديم 09-30-2010, 10:23 PM   رقم المشاركة : 6
مشتاق الامير
 
الصورة الرمزية مشتاق الامير





مشتاق الامير غير متواجد حالياً

مشتاق الامير على طريق التميز


افتراضي

مشكور ياغالي بارك الله فيك يا ملك الملوك

رد مع اقتباس
قديم 09-30-2010, 11:14 PM   رقم المشاركة : 7
ابو فارس
 
الصورة الرمزية ابو فارس





ابو فارس غير متواجد حالياً

ابو فارس سيصبح متميزا في وقت قريب


افتراضي

على راسي اخي الحبيب شاكرا مرورك الجميل

رد مع اقتباس
قديم 12-01-2011, 03:33 AM   رقم المشاركة : 8
عبدالرحمن العقول
 
الصورة الرمزية عبدالرحمن العقول





عبدالرحمن العقول غير متواجد حالياً

عبدالرحمن العقول على طريق التميز


افتراضي

سلمت يمناك اخي الكريم

رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
كيفية الوضوء الصحيحيه للكبار خالد الشبول مواضيع وبرامج دينية عامة 3 11-28-2011 02:37 PM
معلومه منوعه .. خاسر من لم يقراها عماد قطيش مواضيع وبرامج دينية عامة 2 05-30-2010 10:35 AM


الساعة الآن 06:07 PM
Powered by vBulletin® Version 3.8.11
Copyright ©2000 - 2024, vBulletin Solutions Inc.